Քաղաքականություն
22.07.2021 | 19:49
«Թալիբան» ծայրահեղական շարժման պաշտոնական ներկայացուցիչ Զաբիուլլա Մուձահեդը «ՌԻԱ Նովոստիին» հայտարարել է, որ շարժումը վերահսկում է Թուրքմենստանի ու Իրանի հետ ողջ սահմանը։
«Թուրքմենստանի ու Իրանի հետ սահմանը, ինչպես նաև՝ Պակիստանի հետ սահմանը՝ բացառությամբ փոքր հատվածների, ևս ամբողջությամբ մեր վերահսկողության տակ է գտնվում․․․
Տաջիկստանի հետ սահմանն ամբողջությաբ մեր վերահսկողության տակ է՝ Բադախշանից մինչև Տախարա ու Կանդուրա։ Ուզբեկստանի հետ Աֆղանստանի սահմանի մեծ մասը ևս գտնվում է թալիբների վերահսկողության տակ, միայն Հայրաթանն է վերահսկվում Քաբուլի կողմից»,- հայտարարել է Մուջահեդը։
Հիշեցնենք՝ ավելի վաղ Վաշինգտոնը հայտարարել էր Աֆղանստանից մինչև սեպտեմբերի 11-ը զորքերի դուրսբերման մասին։ Ավելի ուշ այս ժամկետը կրճատվել է մինչ օգոստոսի 31-ը։ ԱՄՆ-ի և նրա դաշնակիցների զորքերի դուրսբերման ֆոնին, թալիբներն իրենց վերահսկողության տակ են վերցնում Աֆղանստանի ավելի շատ թվով շրջաններ։
Հիշեցնենք նաև, որ Թուրքիան առաջարկել է Աֆղանստանից ամերիկյան զորքերի և ՆԱՏՕ անդամ մյուս երկրների ուժերի դուրսբերումից հետո զորք ուղարկել այդ երկիր՝ պաշտպանելու և շարունակելու աշխատեցնել Քաբուլի միջազգային օդանավակայանը:
Իսկ ՀԱՊԿ գլխավոր քարտուղար Ստանիսլավ Զասը հայտարարել էր, որ իրավիճակը Աֆղանստանի հյուսիսային շրջաններում վատանում է և լուրջ անհանգստություն առաջացնում կազմակերպության համար։ Նրա խոսքով՝ անհրաժեշտ է Տաջիկստանին օգնություն ցուցաբերել հարավային սահմանների անվտանգության ապահովման համար։ Մինչ այդ, ՀԱՊԿ-ում Տաջիկստանի Հանրապետության մշտական և լիազոր ներկայացուցիչ Հասան Սուլթոնովը խնդրել էր ՀԱՊԿ անդամներին՝ օգնել պաշտպանել Աֆղանստանի հետ հանրապետության սահմանը:
Տաթև Ֆռանգյան
