29.06.2026 | 23:29
Ալեն Սիմոնյանը պարգևատրել է պետական պահպանության ծառայության աշխատողներին
Երևանում մեկնարկել է Եվրոպա-Կովկաս-Ասիա միջազգային տրանսպորտային միջանցքի` «ՏՐԱՍԵԿԱ» ծրագրի նիստը
Տնտեսություն
06.03.2018 | 16:16
Երևանում մարտի 6-ին մեկնարկել է Եվրոպա-Կովկաս-Ասիա միջազգային տրանսպորտային միջանցքի` «ՏՐԱՍԵԿԱ» ծրագրի միջկառավարական հանձնաժողովի հերթական`13-րդ նիստը։
Միջոցառմանը մասնակցելու համար Երևան են ժամանել «ՏՐԱՍԵԿԱ» ծրագրի մասնակից 12 երկրների բարձրաստիճան պաշտոնյաներ (այդ թվում՝ Իրանից, Վրաստանից, Ադրբեջանից), ՀՀ-ում «ՏՐԱՍԵԿԱ» անդամ-պետությունների դեսպանություններ, «ՏՐԱՍԵԿԱ» միջկառավարական հանձնաժողովի մշտական քարտուղարության ու միջազգային կազմակերպությունների ներկայացուցիչներ, ինչպես նաև Եվրահանձնաժողովի բարձրաստիճան պաշտոնյաներ։
Նիստի մեկնարկից առաջ Ուկրաինայի ենթակառուցվածքների նախարարի տեղակալ Վիկտոր Դովգանը նիստի նախագահությունը պաշտոնապես հանձնեց Հայաստանին: Աշխատանքները մեկնարկեցին ՀՀ տրանսպորտի, կապի և տեղեկատվական տեխնոլոգիաների նախարար Վահան Մարտիրոսյանի գլխավորությամբ ։
Նախարար Վահան Մարտիրոսյանը ողջունեց հյուրերին` կարևորելով այս միջոցառման անցկացումը Երևանում և Հայաստանի անդամակցության ընթացքում մեր երկրում իրականացված տեխնիկական աջակցության և ներդրումային բազմաթիվ ծրագրերը։
«Հայաստանի՝ վերջին տարիների վարած տնտեսական քաղաքականությունից ակնառու է, որ ճանապարհաշինական և ենթակառուցվածքների զարգացման ծրագրերը մեր քաղաքականության լոկոմոտիվներից են։ Դրանք տարեցտարի շատանում և ընդլայնվում են»,- նշեց նախարարը` հավելելով, որ Հայաստանի հետագա առաջնահերթություններից պետք է լինեն տարածաշրջանում ճանապարհային անվտանգության ապահովումը, ճանապարհների և ծառայությունների թվայնացումը, ինչպես նաև անցակետերի արդիականացումն ու համապատասխանեցումը ժամանակակից նորագույն չափորոշիչներին:
Նախարարն իր խոսքում նաև նշեց, որ միայն զարգացած ճանապարհային ենթակառուցվածքների, բաց սահմանների, ազատ առևտրի և ներդրումների պայմաններում է հնարավոր խթանել թե՛ տնտեսությունների զարգացումը, թե՛ աշխատատեղերի ստեղծումն ու մարդկանց կենսամակարդակի բարձրացումը տարածաշրջանային մակարդակով։
Նիստի ընթացքում հաստատվելու է «ՏՐԱՍԵԿԱ»-ի մաստեր պլանի և Միջկառավարական հանձնաժողովի` 2016-2026թթ. համար Եվրոպա-Կովկաս-Ասիա միջազգային տրանսպորտային միջանցքի զարգացման ռազմավարության իրականացմանն ուղղված գործողությունների ծրագիրը: Նախատեսվում է հաստատել նաև հնգամյա ժամկետի համար Եվրոպա-Ասիա-Կովկաս միջազգային տրանսպորտային միջանցքի երկայնքով զարգացման ճանապարհային քարտեզը: Միաժամանակ, միջկառավարական հանձնաժողովի կողմից կհաստատվի «ՏՐԱՍԵԿԱ»-ի ճանապարհային երթուղիների մրցակցության բարձրացմանը և հետագայում միջազգային ավտոմոբիլային փոխադրումների կատարելագործմանն ուղղված գործողությունների ծրագիրը: Նաև նախատեսվում է անցկացնել «ՏՐԱՍԵԿԱ» միջկառավարական հանձնաժողովի մշտական քարտուղարության գլխավոր քարտուղարի ընտրությունը։ Վրաստանի էկոնոմիկայի և կայուն զարգացման նախարարի տեղակալ Գեորգի Չերկեզիշվիլին լրագրողների հետ առանձնազրույցում ասաց, որ Վրաստանը նույնպես «ՏՐԱՍԵԿԱ»-ի ակտիվ մասնակիցներից է և շատ մեծ ծրագրեր ու նպատակներ ունի դրա շրջանակներում։
«Կարծում ենք, որ համաժողովից հետո և այս նիստի արդյունքների հիման վրա ավելի ակտիվ ենք համագործակցելու «ՏՐԱՍԵԿԱ»-ի շրջանակներում ու նորանոր համատեղ ծրագրեր ենք իրականացնելու»,- նշեց Գեորգի Չերկեզիշվիլին։ Նա ասաց, որ ակտիվ զարգացնում են ճանապարհային ենթակառուցվածքները, և դրա մեջ մտնում է նաև Լարսի անցակետը, որտեղ նույնպես նախատեսվում են բարելավման աշխատանքներ։
Իրանի տրանսպորտի և քաղաքաշինության նախարարության ներկայացուցիչ Մեհտի Աշրաֆին ասաց, որ Հայաստանը շատ կարևոր աշխարհագրական դիրք է զբաղեցնում և կամուրջ է դեպի տարբեր աշխարհամասեր։ «Մեզ համար համագործակցությունը Հայաստանի հետ շատ կարևոր նշանակություն ունի։ Պատրաստ ենք ընդլայնելու մեր գործակցությունը, այդ ուղղությամբ բազմաթիվ ծրագրեր ունենք»,- հավելեց Մեհտի Աշրաֆին։ Նիստը, որին նախորդել են մարտին 5-ին կայացած աշխատանքային խմբի աշխատանքները, կշարունակվի մինչև օրվա ավարտը։
