30.10.2026 | 11:18
Հարկադիրի Շիրակի բաժնի պետը կալանավորվել է
Էմանուել Մակրոնին կարող էին գաղտնալսել իսրայելական ծրագրի միջոցով․ Ֆրանսիան շատ լուրջ և հեռահար հետևանքներ է խոստանում․ BBC
Քաղաքականություն
21.07.2021 | 20:33
Լրատվամիջոցներում հայտնված հաղորդագրությունների համաձայն՝ Ֆրանսիայի նախագահ Էմանուել Մակրոնն աշխարհի այն առաջնորդներից էր, ում հեռախոսահամարը կարող էր հաքերային հարձակման ենթարկված լինել։ Ենթադրվում է, որ հաքերները մտադիր էին Pegasus վիրուսային ծրագիրը գործարկել հեռախոսների մեջ և դրա օգնությամբ գաղտնալսել խոսակցությունները:
Pegasus-ն իսրայելական NSO Group-ի կողմից մշակված ծրագիր է: Ընդհանուր առմամբ, ցուցակը, որը հետաքրքրել է NSO-ի հաճախորդներին, պարունակել է շուրջ 50 հազար հեռախոսահամար՝ ներառյալ Մակրոնի հեռախոսահամարը, գրում է BBC-ի ռուսական ծառայությունը:
NSO ընկերությունը հերքում է իր ցանկացած առնչությունը հաքերների կամ այս ցուցակի հետ՝ պնդելով, որ քննարկվող ծրագիրը նախատեսված է հանցագործների և ահաբեկիչների դեմ պայքարելու համար:
Ըստ ֆրանսիական Le Monde պարբերականի՝ նախագահ Մակրոնի հեռախոսահամարը, որը նա օգտագործում է 2017 թվականից, ցուցակում ներառել է Մարոկկոյի հետախուզությունը: Մարոկկոյի իշխանությունները, սակայն, հերքում են իսրայելական ընկերության հետ որևէ կապը։
Բացի այդ, այս ցուցակում ինչ-որ մեկի հեռախոսահամարի առկայությունը դեռևս չի նշանակում, որ լրտեսող ծրագիր է օգտագործվել այդ հեռախոսահամարի տիրոջ դեմ, այլ նշանակում է միայն, որ այն հավանական թիրախ է հանդիսանում:
Ֆրանսիայի նախագահի պարագայում ոչ ոք չի կարող հաստատ ասել՝ արդյո՞ք նրա հեռախոսում երբևէ ներդրվել է հաքերային ծրագիր:
Նշենք, որ ցանկում ընդգրկված այլ բարձրաստիճան քաղաքական գործիչների թվում են Իրաքի նախագահ Բարամ Սալիհը և Հարավաֆրիկյան Հանրապետության նախագահ Սիրիլ Ռամաֆոսան, ինչպես նաև Պակիստանի, Եգիպտոսի և Մարոկկոյի ներկայիս վարչապետերը և նույնիսկ Մարոկկոյի թագավորը:
Ընդհանուր առմամբ, գաղտնալսման պոտենցիալ թիրախներ կարող էին լինել 34 երկրների ավելի քան 600 պետական պաշտոնյաներ: Ինչպես նշել են Ֆրանսիայի նախագահի աշխատակազմից, եթե բացահայտված փաստերը հաստատվեն, դա կարող է ունենալ շատ լուրջ և հեռահար հետևանքներ:
Տաթև Ֆռանգյան
