Եթե ԱՄՆ-ը ՌԴ-ից զենք գնելու համար Հայաստանի նկատմամբ պատժամիջոց կիրառի, ապա դրանով կխախտի տարածաշրջանում զենքի բալանսը. քաղաքագետ

«ՌԴ-ում նախընտրական շրջան է, իսկ այդ ժամանակ ցանկացած երկրի գործող իշխանությունն ու մնացած թեկնածուները փորձում են ասել՝ ով ինչ ունի, ինչ է արել, ինչպես է պատկերացնում երկրի զարգացումը: Պուտինին պետք էր ներկայացնել հաջողություններ, իսկ քանի որ տնտեսությունում ու այլ ոլորտներում չունի հաջողություններ, նախընտրական շրջանը լավագույն ժամանակահատվածն էր, որպոսզի ցույց տար, թե ՌԴ ռազմարդյունաբերությունն ինչ հաջողությունների է հասել»,- այսօր լրագրողների հետ հանդիպմանն ասաց քաղաքագետ Թևան Պողոսյանը։

Պողոսյանն անդրադառնալով այն հարցին, թե ինչ կկատարվի, եթե ԱՄՆ-ը պատժամիջոցներ կիրառի Հայաստանի նկատմամբ Ռուսաստանի ռազմարդյունաբերական համալիրի ընկերություններից զենք ձեռք բերելու համար, ասաց․ «Իրենք էլ, իրենց համանախագահներն էլ հասկանում են, որ եթե Հայաստանում Ռուսաստանից գնվող զինատեսակները չլինեն՝ Ադրբեջանն ինչպիսի քայլերի կարող է գնալ»։

Իսկ քաղաքագետ Սուրեն Սարգսյանն էլ հավելեց, որ եթե Միացյալ Նահանգները, այդուհանդերձ, որոշում կայացնի պատժամիջոցներ կիրառել Հայաստանի նկատմամբ, եթե Հայաստանը շարունակի զենք ձեռք բերել ՌԴ-ից, ապա դրանով ԱՄՆ-ը խախտելու է տարածաշրջանում զինված ուժերի ու զենքի բալանսը. «Իսկ սա առնվազն վտանգավոր երևույթ է և ուղղակիորեն բխում է Ադրբեջանի շահերից այնքանով, որ Ադրբեջանը, ի տարբերություն Հայաստանի, զենք ձեռք բերելու համար բավականին լուրջ շուկաներ ունի»:

Մանրամասները՝ տեսանյութում։