Լավրովը հայտարարել է Եվրասիայում նոր աշխարհառազմավարական ուրվագծի ձևավորման մասին

Եվրասիայի տարածքում՝ Պորտուգալիայից մինչև Ինդոնեզիա, մի շարք նորարարական ինտեգրացիոն նախագծեր են իրականացվում, մասնավորապես՝ աշխարհի նոր աշխարհառազմավարական ուրվագծի ձևավորումը: Այս մասին գրել է ՌԴ ԱԳ նախարար Սերգեյ Լավրովը ռուս-չինական պայմանագրի 20-ամյակի կապակցությամբ հրապարակված բարիդրացիության, բարեկամության և համագործակցության վերաբերյալ իր հոդվածում, փոխանցում է EADaily-ն:

«Այսօր Եվրասիայի տարածքում մի շարք նորարարական ինտերգրացիոն նախագծեր են իրականացվում։ Դրանց թվում են Եվրասիական տնտեսական միությունն ու Չինաստանի «Մեկ գոտի, մեկ ճանապարհ» նախաձեռնությունը։ Նրանց պոտենցիալներին համապատասխանեցման աշխատանքը լավ հեռանկարներ ունի: Մենք կարող ենք խոսել մեր ընդհանուր մայրցամաքում՝ Լիսաբոնից մինչև Ջակարտա, խաղաղության, կայունության, անվտանգության և տնտեսական բարգավաճման նոր աշխարհառազմավարական ուրվագծի ձևավորման մասին»,- գրել է նախարարը «Ռոսիյսկայա գազետա»-ում և «Ժողովրդական օրաթերթ» չինական պարբերականում հրապարակված հոդվածում:

Ըստ Լավրովի՝ այս նոր ինտեգրացիոն կազմավորումը «պետք է հիմնված լինի միջազգային իրավունքի և թափանցիկության սկզբունքների վրա, բաց բոլոր երկրների համար՝ առանց բացառության, այդ թվում՝ ԵՏՄ, ՇՀԿ, ԱՍԵԱՆ և, հուսով ենք, ԵՄ-ի համար»:

«Հենց այս դարակազմիկ խնդրի լուծմանն է ուղղված Մեծ Եվրասիական գործընկերություն ստեղծելու՝ Ռուսաստանի Դաշնության նախագահ Վլադիմիր Պուտինի նախաձեռնությունը: Չինացի մեր ընկերների հետ միասին կշարունակենք այն համակարգված կերպով իրականացնել»,- գրել է նա:

Լավրովը նաև ընդգծել է, որ ռուս-չինական պայմանագիրը հաջողությամբ դիմացել է ժամանակի ստուգմանը։

Տաթև Ֆռանգյան