Լուկաշենկոն թույլատրել է բանակը ներգրավել բողոքի ցույցերի դեմ պայքարին

Բելառուսի ղեկավար Ալեքսանդր Լուկաշենկոն հավանություն է տվել «Արտակարգ դրության մասին» օրենքում փոփոխություններին։ Հուլիսի 15-ին ստորագրված փաստաթղթում հստակեցվում է, թե ինչ է նկատի առնվում անկարգություններ հասկացության տակ, որոնց դեպքում երկրում, ինչպես տարերային աղետների ու արտակարգ իրավիճակներ պարագայում, արտակարգ դրություն է մտցվում։

Բելառուսի իշխանությունները սահմանադրական կարգի բռնի տապալման փորձերի, զինված ապստամբության, ազգամիջյան և միջդավանանքային բախումների հետ մեկտեղ ներառել են նաև «զանգվածային անկարգությունները», գրում է DW-ի ռուսական ծառայությունը:

Օրենքի համաձայն՝ արտակարգ իրավիճակների դեպքում կարող է կասեցվել լրատվամիջոցների թողարկումն ու տարածումը, կարող է ներդրվել լրագրողների հավատարմագրման հատուկ ընթացակարգ, իսկ ինտերնետային ռեսուրսների և առցանց հրատարակությունների հասանելիությունը՝ սահմանափակվել:

Օրենքը նաև ընդլայնում է իրավապահ մարմինների շրջանակը, որոնք ներգրավված կլինեն արտակարգ իրավիճակի պահպանման մեջ՝ դրանց շարքում ներառելով ԱԻՆ-ը, Քննչական կոմիտեն, Դատաբժշկական փորձաքննությունների պետական կոմիտեն և ֆինանսական հետաքննությունների վարչությունը։

Բացի այդ, օրենքում նշվում է, որ Բելառուսի Զինված ուժերը հավելյալ խնդիրներ կատարելու իրավունք են ստանում, որոնց թվում է ահաբեկչության դեմ պայքարը, հանրային անվտանգության ապահովումը, զանգվածային անկարգությունների կանխումը, պահպանվող անձանց ու օբյեկտների անվտանգության ապահովումը։

Տաթև Ֆռանգյան