Քաղաքականություն
16.07.2021 | 23:01
Առողջապահության համաշխարհային կազմակերպության (ԱՀԿ) ղեկավար Թեդրոս Գեբրեյեսուսը հայտարարել է, որ չափազանց կարևոր է ստուգել՝ արդյոք լաբորատորիաներն առնչություն ունեցել են քովիդի համաճարակի մեկնարկի հետ և Չինաստանին բաց համագործակցության կոչ է արել։
«Լիարժեք տեղեկատվությունը կօգնի բացառել այս տարբերակը»,- պարզաբանել է նա, գրում է ՌԲԿ-ն։
Դեռևս վաղ է բացառել այն տարբերակը, որ SARS-CoV-2 կորոնավիրուսը, որն առաջացնում է COVID-19 հիվանդությունը, հայտնվել է չինական Ուհան քաղաքի լաբորատորիայում և տարածվել արտահոսքի պատճառով, հայտարարել է ԱՀԿ ղեկավարը։
«Ես ինքս եմ եղել լաբորանտ, ես իմունոլոգ եմ, աշխատել եմ լաբորատորիայում ու գիտեմ, որ լաբորատորիաներում միջադեպեր են տեղի ունենում։ Այդպես լինում է»,- ասել է նա։
Գեբրեյեսուսը շեշտել է, որ կատարվածը ստուգելը շատ կարևոր է՝ հասկանալու համար՝ արդյո՞ք համաճարակը որևէ կերպ կապված է լաբորատորիաների հետ:
«Մեզ ուղղակի տեղեկատվություն է պետք այն մասին, թե ինչ իրավիճակ է եղել այս լաբորատորիայում համաճարակից առաջ և դրա սկզբում։ Եթե ամբողջական տեղեկատվություն ստանանք, կարող ենք բացառել (լաբորատոր տարբերակը)»,- ասել է նա՝ բացատրելով, որ Չինաստանի համագործակցելու պատրաստակամությունն այստեղ կարևոր է:
ԱՀԿ ղեկավարը նաև կոչ է արել Չինաստանին բաց և թափանցիկ համագործակցության, հատկապես՝ «տեղեկատվության, նախնական տվյալների առումով, որոնք մենք խնդրում էինք համաճարակի առաջին օրերին»:
Տարեսկզբին ԱՀԿ հատուկ առաքելությունը մեկնել էր Ուհան, որտեղ հայտնաբերվել էին կորոնավիրուսով առաջին վարակվածները՝ համաճարակի պատճառները պարզելու համար: Փորձագետները դիտարկում են վիրուսի ծագման չորս վարկած՝ մարդու ուղղակի վարակում չղջիկներից, փոխանցում միջանկյալ կենդանուց, փոխանցում սննդի շղթայով և արհեստական ծագում, այսինքն՝ լաբորատոր պայմաններում ստեղծում:
Տաթև Ֆռանգյան
