Քաղաքականություն
14.07.2021 | 14:46
Վրաստանի 4 հեռուստաալիք հուլիսի 14-ից 24 ժամով դադարեցրել է հեռարձակումը՝ ի նշան լրագրողների հանդեպ բռնության դեմ բողոքի, գրում է DW-ի ռուսական ծառայությունը։
Թբիլիսիում բողոքի ցույցերի ժամանակ ծեծի էր ենթարկվել Pirveli հեռուստաընկերության օպերատոր Ալեքսանդր Լաշկարավան, իսկ միջադեպից օրեր անց նա մահացել է:
«Pirveli», «Mtavari», «Formula» և «Kavkasia» հեռուստաընկերությունների ղեկավարությունը պահանջում է, որ իշխանությունները պատժեն բռնության մեջ ներգրավված բոլոր անձանց: Այս հեռուստաընկերությունները սև ֆոնի վրա հեռարձակում են 53 լրագրողների անունները, որոնք ծեծի են ենթարկվել հուլիսի 5-ին ակցիայի ժամանակ:
Հեռուստաընկերությունների բողոքի ակցիան անցկացվում է «Հրաժարակա՛ն տուր, Իրակլի Ղարիբաշվիլի, պատժի՛ր բոլոր բռնարարներին» կարգախոսով:
Հիշեցնենք՝ Ալեքսանդր Լաշկարավան ծեծի էր ենթարկվել ԼԳԲՏ համայնքի հակառակորդների կողմից, ուղեղի ցնցում և դեմքի ոսկորների բազմաթիվ կոտրվածքներ ստացել, ինչից հետո հոսպիտալացվել էր: Երեք օր անց նրան դուրս են գրել հիվանդանոցից, սակայն հուլիսի 11-ին նրան իր բնակարանում մահացած են գտել:
Լաշկարավայի մահվան պատճառը կարող էր լինել թմրանյութի գերդոզավորումը, հայտնել էր Վրաստանի ՆԳՆ Կենտրոնական քրեական ոստիկանության վարչության տնօրեն Մամուկա Չեկելիձեն՝ վկայակոչելով քիմիական փորձաքննության տվյալները:
Օպերատորի մահը ընդդիմադիրների զանգվածային բողոքի ցույցերի պատճառ է դարձել, որոնք պահանջում են Վրաստանի կառավարության հրաժարականը՝ մեղադրելով լրատվամիջոցների աշխատակիցներին ծեծի ենթարկելու մեջ:
Տաթև Ֆռանգյան
