Տպավորություն է՝ գյուղապետից օգնություն ստացածներին կանչում, ասում են՝ ձեզ կաշա՞ռք են տվել. Հրայր Թովմասյան․ ՏԵՍԱՆՅՈՒԹ

Սահմանադրական դատարանում հունիսի 20-ին կայացած արտահերթ խորհրդարանական ընտրությունների արդյունքներն անվավեր ճանաչելու գործով դատաքննությանը ՍԴ դատավոր Հրայր Թովմասյանն անդրադարձավ  Սյունիքի մարզի Որոտան վարչական շրջանի բնակիչների բարձրաձայնած խնդրին:

Նա նշեց, որ համացանցում տեսանյութ է շրջանառվում, որ, Որոտանի բնակիչների խոսքերով, համայնքի ղեկավարից իրենց դիմումների համաձայն ստացել են համապատասխան օգնություն. «Եվ հիմա, տպավորություն է, որ գյուղապետից օգնություն ստացածներին կանչում, ասում են՝ ձեզ կաշա՞ռք են տվել: Որոտանի բնակիչների խոսքից ակնհայտ է՝ իրենք նման բան չեն ասել, որ իրենց ընտրակաշառք է առաջարկվել, ընդհակառակը՝ հերքում են:

Դիմելով դատախազության ներկայացուցիչ Սևակ Հովհաննիսյանին՝ Թովմասյանը հետաքրքրվեց. «Ուզում եմ հաստատեք կամ հերքեք՝ արդյո՞ք նման երևույթ կա, որ եթե ինչ-որ մեկն օգնություն է ստացել, գնում և հարցնում են, արդյո՞ք ունի սահմանափակվածություն, միայն այս համայնքում է, թե՞ դատախազությունը կամ իրավապահ մարմիններն ընտրությունները նշանակելուց հետո համայքների ղեկավարների կողմից տրված օգնության հետքերով շարունակում են գնալ»:

Դատախության ներկայացուցիչը նշեց, որ ծանոթ չէ այդ նյութին, ոչ էլ դրա հետ կապված դիրքորոշումներին, իսկ ինչ վերաբերում է մոտեցմանը՝ արդյոք դատախազությունը բոլոր այդպիսի դեպքերում դրսևորում է միանսական մոտեցում, թե ոչ, վստահեցրեց, որ դատախազությունը յուրաքանչյուր քրեական գործով համանման երևույթների նկատմամբ դրսևորում է միասնական մոտեցում:

«Այսինքն, անկախ ընտրական գործընթացի մեջ լինելու ժամանակահատվածից, քրեական գործերն ընթանում են իրենց բնականոն հունով, կատարվում են համապատասխան քննչական և դատավարական գործողություններ»,- նշեց Հովհաննիսյանը:

Մանրամասները՝ տեսանյութում: