Քաղաքականություն
10.07.2021 | 14:43
«Հայաստան» դաշինքն ակնկալում է, որ ՍԴ-ն կկայացնի 3 որոշումներից մեկը՝ կամ անվավեր կճանաչի ընտրության արդյունքներն առհասարակ, կամ անվավեր կճանաչի և կնշանակի ընտրության երկրորդ փուլ, կամ կսահմանի մանդատների բաշխման կարգ։
«Արտահերթ խորհրդարանական ընտրություններն անվավեր ճանաչելու հիմքեր կան»,- այս մասին ՍԴ նիստում ասաց «Հայաստան» դաշինքի ներկայացուցիչ Արամ Վարդևանյանը:
«Ես կարծում եմ, որ սույն վեճի լուծումը նաև ուղենիշային է լինելու Հայաստանում ընտրական վեճերի լուծման տեսանկյունից, կարծում եմ ՝ այս վեճի լուծումն առանցքային նշանակություն է ունենալու: Այո, մենք միանշանակ պնդում ենք, որ այստեղ անվավերության հիմքերն առկա են, պնդում ենք, որ ընտրության արդյունքներն առհասարակ անվավեր ճանաչելու հիմքերը կան: Դրանք պայմանավորված են՝ թե քանակական, թե որակական իրավախախտումներով»,-ասաց Վարդևանյանը:
ՍԴ-ում ընտրությունների արդյունքները վիճարկել է 4 քաղաքական ուժ: Սահմանադրական դատարանը որոշել էր միավորել ընտրությունների արդյունքները վիճարկելու վերաբերյալ «Հայաստան» և «Պատիվ ունեմ» դաշինքների, «Զարթոնք» և «Հայոց հայրենիք» կուսակցությունների դիմումները, քանի որ դիմումները վերաբերվում են նույն հարցին:
