ԲՀԿ-ական Միքայել Մելքումյանը «Ելք»-ին հորդորում է  ընդդիմադիր կեցվածք դրսևորել ու դեմ քվեարկել

«ՀՀ վարչատարածքային բաժանման մասին» ՀՀ օրենքում փոփոխություններ և լրացումներ կատարելու մասին նախագծի վերաբերյալ ամփոփիչ ելույթներով հանդես եկան խմբակցությունների ներկայացուցիչները։

«Ելք» խմբակցության ղեկավար Նիկոլ Փաշինյանը հայտարարեց, որ իրենք չեն մասնակցելու քվեարկությանը: «Առաջիկայում սեփական նախաձեռնությամբ կլինենք այդ համայնքներում, վերլուծություն կանենք և համապատասխան առաջակությամբ հանդես կգանք»,- ասաց նա:

Փաշինյանը, արձագանքելով ՀՀԿ խոսնակի այն դիտարկմանը, թե տեղային հայրենասիրությունն է նպաստում երկիրը սիրելուն, նկատեց․ «Չհամաձայնվել չեմ կարող, բայց, ցավոք, ՀՀ-ում հայրենասիրությունը ինչպես սկսվում է փողոցային, բակային հայրենասիրությունից, այնպես էլ հաճախ նաև ավարտվում է այնտեղ»։

«Ծառուկյան» խմբակցության անունից խոսեց ԱԺ փոխնախագահ Միքայել Մելքումյանը՝ հայտարարելով, որ դեմ են քվեարկելու: «Այս միջոցառումը գտնում ենք, որ ժամանակավրեպ է, և պետությունն իր ռեսուրսներով պատրաստ չէ»,- ասաց նա:

Ի դեպ, Մելքումյանը դիմեց Նիկոլ Փաշինյանին՝ կոչ անելով դեմ քվեարկել․ «Պարոն Փաշինյան, ես կարծում էի ընդդիմությունը միասնական դիրքորոշում պետք է ընդուներ, ես կարծում էի դուք էլ պետք է դեմ լինեք: Բարեկամաբար եմ ասում, կարծում եմ՝ ճիշտ կլինի, որ միասնական դիրքորոշումով առաջ շարժվենք»,- ասաց նա։

Իշխող ՀՀԿ-ի անունից ելույթով հանդես եկավ խմբակցության ղեկավար Վահրամ Բաղդասարյանը՝ կոչ անելով միասնական կողմ քվեարկել այս նախագծին «Տրամաբանական բոլոր առաջարկությունները կարող են քննարկվել: Այստեղ նեղ անձնական շահեր չկան, հորդորում եմ բոլորին կողմ քվեարել և հնարավորություն տալ այս գործընթացը շարունակելու»,-ասաց նա։

Սեդա Ղուկասյան