Գյուղացիները կովերից վարակվել են սիբիրախտով. Վանևանում խոշոր եղջերավորներին այրում են, կաթը՝ թափում. ՏԵՍԱՆՅՈՒԹ

Հունիսի 22-ից սկսած Գեղարքունիքի մարզի Վանևան համայնքում օր չկա, որ գյուղացին չբացի անասնագոմի դուռն ու անկած անասուն չտեսնի: Վերջին օրերին համայնքում արդեն քսան կով է սատկել: Գյուղացիները պնդում են՝ իրենց համայնքում սիբիրախտ է տարածված:

Վալտեր Ասլանյանն ութսուն գլուխ խոշոր եղջերավոր անասուն ունի, որից ութն անկել է, մի քանիսն էլ, ըստ նրա, սիբիրախտով են վարակված: Ֆերմերը նշում է՝ հիվանդությունը տարածվել է հարևան Տորֆավան գյուղից, որտեղ անկման դեպքեր գրանցվել էին մայիսի վերջից:

Վարդենիսի տարածաշրջանում ապրիլին սիբիրախտի դեմ պատվաստումներ են իրականացվել, գյուղացիները նշում են՝ անկման դեպքերից հետո կրկին վերսկսել են պատվաստումները, սակայն Վալտեր Ասլանյանը համոզված է, որ պատվաստման գործընթացն իրականացվել է թերի, ինչն էլ դարձել է կովերի համատարած վարակման պատճառ:

Սիբիրախտի առկայությունը Էկոնոմիկայի նախարարության «Գյուղատնտեսական ծառայությունների կենտրոն» ՊՈԱԿ-ի տնօրեն Գառնիկ Հովհաննիսյանը հաստատում է, բայց համամիտ չէ անասնատերերի հետ, որ պատվաստանյութն անհրաժեշտ չափաբաժնով չի ներարկվել:

Մինչ գյուղացիները դժգոհում են, «Գյուղատնտեսական ծառայությունների կենտրոն» ՊՈԱԿ-ի տնօրենը ասում է՝ խնդիրն իսպառ վերացված է:

Գյուղացիները կառավարությունից փոխհատուցում են ակնկալում: Էկոնոմիկայի նախարարի պաշտոնակատարն ասում է՝ փոխհատուցման մեխանիզմներ չունեն, բայց ստեղծված իրավիճակը կքննարկեն:

Չնայած խոշոր եղջերավոր անասունների անկման դեպքերին՝ Էկոնոմիկայի նախարարությունն անասնահամաճարակային վիճակը մարզերում գնահատում է կայուն և վերահսկվող։ Այս մասին նշված է նախարարության տարածած հաղորդագրության մեջ: Վանևանում գերատեսչության պաշտոնական հաղորդագրությանն ի պատասխան՝ սատկած եղջերավորին են մատնացույց անում:

Սիբիրյան խոցն անասուններից նաև բնակիչներին է փոխանցվել: Առողջապահության նախարարությունից փոխանցում են, որ հունիսի 29-ին կատարվել է նմուշառում Տորֆավան և Վանևան համայնքների 7 բնակչից։ Նրանցից 3-ի մոտ հաստատվել է «սիբիրյան խոց» ախտորոշումը: Հիվանդներից 2-ի վիճակը գնահատվել է միջին ծանրության, մեկինը՝ թեթև։ Նրանք բուժում են ստանում Մարտունու բժշկական կենտրոնում:

Մինչ հետազոտությունների արդյունքները ցույց կտան, թե Վարդևանում բնակիչների ու խոշոր եղջերավորների վարակման աղբյուրը որն է, անասնատերերը շարունակում են ահազանգել, որ հիվանդությունը չի նահանջում:

Մանրամասները՝ տեսանյութում։

Նարեկ Կիրակոսյան