Քաղաքականություն
01.07.2021 | 13:28Կառավարության այսօրվա՝ հուլիսի 1-ի նիստում որոշվեց գործարար Սամվել Ալեքսանյանի ընտանիքին պատկանող «Ալեքս Տեսքտիլ» ընկերությանը՝ 106 մլն դրամի արտոնություն տրամադրել: Արդյո՞ք մեր պետության պետբյուջեն դրանից չի տուժում: Կառավարության նիստից հետո լրագրողների հետ զրույցում անդրադառնալով այս հարցին՝ Էկոնոմիկայի նախարարի պաշտոնակատար Վահան Քերոբյանը նշեց. «Մաքսատուրքերը գնում են ԵԱՏՄ բյուջե, մեր պետբյուջեն չէ, բայց, իհարկե, մեր պետբյուջեն անուղղակիորեն սնվում է ԵԱՏՄ բյուջեից: Վերջերս մենք խիստ սահմանափակել ենք արտոնությունների տրամադրումը, փորձում ենք այնպես անել, որ ներքին շուկայում սպառման տեսանկյունից չտուժի մրցակցությունը և բոլորն ունենան հավասար պայմաններ, և միայն հումքից արտահանման մասով ենք փորձում աջակցել ընկերություններին: Այդ տեսանկյունից այդ ընկերությունը լիովին բավարարում է նոր և խիստ չափանիշներին, դրա համար էլ ստացել է այդ արտոնությունը»:
«Մենք աշխատում ենք օրենքի սահմաններում, մեր գործունեության տրամաբանությունը որևէ ընկերության ճնշելը կամ օգնելը չէ,- նշեց նախարարի պաշտոնակատարը: -Սամվել Ալեքսանյանին տրվել է արտոնություն մի հումքի համար, որը մեծ մասամբ արտահանվելու է: Մենք շարունակելու ենք տեղական արտադրողներին աջակցելը, որպեսզի գրավեն արտաքին շուկաները»:
Մանրամասները՝ տեսանյութում:
