Պուտինը՝ երրորդ համաշխարհային պատերազմի հավանականության մասին

Ռուսաստանի նախագահ Վլադիմիր Պուտինը հայտարարել է, որ եթե անգամ ռուսական նավերը վերջերս Ղրիմի ափերի մոտ տեղի ունեցած միջադեպի ժամանակ խորտակեին բրիտանական Defender ավիակիրը, երրորդ համաշխարհային պատերազմ, միևնույն է, չէր սկսվի, գրում է ՌԻԱ Նովոստին։

«Բոլոր նրանք, ովքեր դա անում են, հասկանում են, որ այդ պատերազմից հաղթող դուրս չեն գա․ սա չափազանց կարևոր է։ Չեմ կարծում, որ մենք ևս կուրախանայինք իրադարձությունների նման զարգացման կապակցությամբ, որի մասին խոսում եք։ Բայց մենք գոնե գիտենք՝ ինչի համար ենք պայքարում։ Մենք մեր տարածքում պայքարում ենք մեզ համար, մեր ապագայի համար։ Չէ՞ որ մենք չենք հազար կիլոմետրեր անցնելով՝ գնացել նրանց մոտ, նրանք են եկել մեր սահմաններին ու խախտել մեր ջրային տարածքը»,- ասել է ռուս առաջնորդը։

Նա բրիտանական ավիակրի հետ կապված միջադեպն անվանել է սադրանք ու հավելել, որ դրան մասնակցել են ոչ միայն բրիտանացիներ, այլ նաև ամերիկացիներ։ Այսպես՝ միջադեպին հետևել է ԱՄՆ ՌՕՈՒ հետախուզական ինքնաթիռը, որն օդ է բարձրացել Կրետե կղզու ավիաբազայից։

Հիշեցնենք՝ հունիսի 24-ին HMS Defender-ը հարավային Ուկրաինայից՝ Օդեսայից ուղևորվել է դեպի Վրաստան, երբ ՌԴ ռազմածովային ուժերը նրան հեռանալու նախազգուշացում են տվել։ Այնտեղ հասնելու համար նավը պետք է անցներ Ղրիմի թերակղզուց դեպի հարավ, որը բռնակցվել է Ռուսաստանի կողմից։ Երբ բրիտանական ավիակիրը 12 մղոն հեռավորությամբ մոտեցել է Ղրիմին, ՌԴ սահմանապահ նավը վտանգավոր քայլ է կատարել․ այն շատ է մոտեցել բրիտանական նավին ու փորձել է ստիպել՝ փոխել ճանապարհը։ Օդ են բարձրացվել կործանիչներ, ռադիոկապով կրակելու նախազգուշացում է տրվել։

Տաթև Ֆռանգյան