16.09.2026 | 00:14
Կռվախնձոր դարձած դուռն ու արտահերթ ընտրությունների նախերգանքը․ Գյումրիի ավագանու նիստը լարվեց. ՏԵՍԱՆՅՈՒԹ
Պետք է հստակեցնել իրավական հիմքը, հետո կատարել սահմանանշում, հակառակ դեպքում անօրինական կլինի. Արա Պապյան. ՏԵՍԱՆՅՈՒԹ
Քաղաքականություն
29.06.2021 | 12:51
Հայաստանի ու Ադրբեջանի միջև սահմանազատում իրականացնելուց առաջ նախ պետք է հստակեցնել այն իրավական հիմքը, որի վրա դա պետք է տեղի ունենա: Այս մասին այսօր հրավիրած ասուլիսում ասաց «Մոդուս Վիվենդի» կենտրոնի ղեկավար, Ազգային Ժողովրդավարական Բևեռի խորհրդի անդամ Արա Պապյանը։
«Ես ուզում եմ հիշեցնել, որ Ադրբեջանը 1991 թվականի հոկտեմբերի 18-ի պետականության վերականգնման մասին սահմանադրական ակտով հրաժարվել է սովետական իրավապայմանագրային հիմքից և իրեն հռչակել առաջին հանրապետության իրավահաջորդ։
Բնականաբար, որևէ հղում ներկա վարչական գծերին՝ որպես միջպետական սահման, չկա և չի կարող լինել։ Եվ որևէ իշխանություն՝ կլինի Նիկոլ Փաշինյանը, թե խորհրդարանը, որն այս վարչական սահմանները կփորձի ճանաչել պետական սահմաններ, նշանակում է ինքը տարածքային ամբողջականության երաշխավորից վերածվում է տարածքային ամբողջականությունը ոտնահարողի և կատարում է դավաճանական գործողություն, դա քրեորեն պատժելի արարք է:
Ի՞նչ պետք է անել: Եթե Ադրբեջանն իրեն համարում է առաջին հանրապետության իրավահաջորդը, Հայաստանը նույնպես իրեն ճանաչում է առաջին հանրապետության իրավահաջորդ, հարցի լուծման քաղաքակիրթ տարբերակ կա։ Դրա քաղաքակիրթ ձևը կա՝ ՄԱԿ-ի դատարան ես գնում, Միջազգային արդարադատության դատարանի ստատուտի 36-րդ հոդվածի երկրորդ մասով կողմերը թող դիմեն այդ նույն դատարանին՝ հստակեցնելու համար այն իրավական հիմքը, որով պետք է որոշվի սահմանը։ Կորոշվի իրավական հիմքը, կողմերը կներկայացնեն համապատասխան իրենց փաստաթղթերը, կռվաններն ու փաստարկները, դրանից հետո կորոշվի։
Իսկ այս ձևը մեր թշնամու կողմից Հայաստանին պարտադրված անօրինական գործողություն է։ Պետք է հստակեցնել իրավական հիմքը, դրա հիման վրա որոշել որն է սահմանը, նոր կատարել սահմանանշում և մնացած գործողությունները»,- նշեց Պապյանը։
Մանրամասները՝ տեսանյութում:
