Քաղաքականություն
03.07.2021 | 20:30Հունիսի 21-ից, ըստ էության, մեկնարկել է Նիկոլ Փաշինյանի և նրա թիմի կառավարման երկրորդ շրջանը: Թեև կառավարության անդամներն առայժմ պաշտոնակատարի կարգավիճակում են, և նոր կառավարությունը դեռ ձևավորված չէ, սակայն թավշյա հեղափոխությամբ իշխանության եկած Փաշինյանը խոստանում է երկրորդ ժամկետում կոշտ լինել:
Քաղաքացիներից, իր բնորոշմամբ, «պողպատե» մանդատ ստացած Նիկոլ Փաշինյանը խոստանում է կյանքի կոչել բոլոր այն խոստումները, որոնք չի իրականացրել, իր ձևակերպմամբ՝ կառավարման «թավշյա» շրջանում:
Իշխանափոխությանը հաջորդած երեք տարիների ընթացքում թեև իրավապահներին հաջողվել է վերականգնել նախկին պաշտոնյաների և նրանց մերձավորների կողմից յուրացված խոշոր գումարներ, սակայն փորձագիտական շրջանակները մշտապես հակադարձել են, որ դրանք այն արդյունքները չէին, ինչին սպասում էր հեղափոխություն իրականացրած հանրությունը:
Նիկոլ Փաշինյանի՝ «օրենքի դիկտատուրայի» հաստատման մասին հայտարարությունից անցել է 12 օր։ Երեք տարին բացարձակ լեգիտիմություն ունեցող Փաշինյանի «թավշյա» կառավարության համար բավարար չեղավ իրականացնելու խոստացված փոփոխությունները։ Որքան ժամանակ կպահանջվի և ինչ քայլեր կանի արդեն նոր՝ «պողպատյա» իշխանությունը՝ պարզ կդառնա առաջիկայում։
Նարեկ Կիրակոսյան
