ԵՐԵՎԱՆԻ ԺԱՄԱՆԱԿՈՎ․ Պատերազմը սառը ցնցուղ էր ժողովրդի գլխին. հիմա նա սթափ է, քան երբևէ. Հակոբ Մովսես․ ՏԵՍԱՆՅՈՒԹ

«Ընտրություններով ժողովուրդն իր գնահատականը տվեց և քաղաքական ուժերից ամեն մեկին իր տեղը ցույց տվեց: Մնում է, որ նրանք իրենց տեղում աշխատեն. այդ դեպքում կունենանք լավ բանավեճ: Հանրային տրամադրություններին հետևելով` կարծում եմ մարդիկ հիմնականում գոհ են»,- Factor.am-ի հետ զրույցում նման տեսակետ է հայտնում բանաստեղծ և թարգմանիչ Հակոբ Մովսեսը:

Նրա խոսքով՝ ընդդիմության զայրույթը, ցասումը մեր ունեցած կորուստների մասով հասկանալի է, և ընդդիմությունն իրավունք ունի պահանջներ ներկայացնել։

«Բայց պետականության ընկալման առումով նոր փուլ ենք մտնելու: Եկել է անձնական համակրանքն ու հակակրանքը մի կողմ դնելու և նորին մեծություն Հայաստանի Հանրապետությանը ծառայելու ժամանակը: Եթե նախկինները պետական շահն են հետապնդում, պետք է առողջ բանավեճ ծավալեն, իսկ եթե շարունակեն նույն թշնամությունն անել, իրենց վերակենդանացման պրոցեսը չի ստացվի, կընդհատվի, կմեռնեն: Հիմա մեր երկրի առօրյային, քաղաքական կյանքին մասնակցելու շանս ունեն»,- ասում է նա:

Հակոբ Մովսեսի համոզմամբ՝ ժողովուրդը սկզբունքների ընտրություն արեց՝ հօգուտ իրեն, ցույց տվեց, որ ամենազուսպ և սթափ մտավորական ուժն է այս պետության մեջ, հասկանում է բոլորի նկրտումներն ու նպատակները. «Հայաստանում չկա քաղաքական որևէ ուժ, որը ժողովրդին չծառայի, որը փորձի դասեր տալ. հայ ժողովուրդը բնազդաբար ստիպեց դա` երեսուն տարվա ընթացքում տեսնելով թալան և ունեզրկում: Պատերազմը սառը ցնցուղ էր ժողովրդի գլխին. հիմա նա սթափ է, քան երբևէ»:

Հարցազրույցն ամբողջությամբ՝ տեսանյութում:

Աննա Բաբաջանյան