Համայնքապետեր, ո՞նց եղավ, որ հայտնվում եք մեզ դատափետող ուժերի ցուցակներում. Ռոմանոս Պետրոսյան. ՏԵՍԱՆՅՈՒԹ

Շրջակա միջավայրի նախարարի պաշտոնակատար, «Քաղաքացիական պայմանագիր» կուսակցության անդամ Ռոմանոս Պետրոսյանը կառավարությունում լրագրողների հետ ճեպազրույցում հերքեց, որ քաղաքական ընդդիմախոսների նկատմամբ ճնշումներ են գործադրվում։

«Մեր նախարարության մասով հերքում եմ այդ ինֆորմացիան։ Մեր նախարարությունում կան կարկառուն դաշնակցականների զավակներ, «Բարգավաճ Հայաստան» կուսակցության ներկայացուցիչների զավակներ, մեկ տասնյակից ավելի նմանատիպ աշխատակիցներ ունենք, նորմալ աշխատում են։

Ինքս շահագրգիռ եմ օրենքի գերակայության և իրավահավասարության երաշխավորման այն քաղաքականությանը, ինչի մեկնարկը դրել ենք մեր թիմով:

Ես իմ քաղաքական, կուսակցական մանդատով բնականաբար քաղաքական գործընթացներում ունեմ որոշակի դերակատարում, մասնավորապես` Կոտայքի մարզում, բայց որևէ կերպ ազդեցություն չեմ ունենում համայնքապետերի հրաժարականների վրա:

Ես գործում եմ բացառապես իմ լիազորությունների, իրավասությունների շրջանակներում, որպես Շրջակա միջավայրի նախարարի պաշտոնակատար՝ իմ քաղաքական գործունեությունը խարսխված է Կոտայքի մարզում՝ իր ենթադրյալ բաղադրիչներով»,- նշեց Պետրոսյանը:

Նա անդրադարձավ նաև այն համայնքապետերին, ովքեր նախընտրական քարոզարշավի ընթացքում սատարում էին ընդդիմադիր քաղաքական ուժերի:

«Հեղափոխությունից հետո բազմաթիվ համայնքապետեր հեռացան իրենց աթոռներից: Դրանք այն համայնքապետներն էին, ովքեր տասնամյակներով բազմել էին այդ աթոռներին, անձնական հարստություն էին դիզել, ապարանքներ էին կառուցել, այն դեպքում, երբ իրենց ղեկավարած գյուղերում տարբեր խնդիրներ կան:

Եվ կային համայնքապետներ, որոնք մեր մեկնած ձեռքը սեղմել են, մեր թիմի գործիչների հետ պայմանավորվել են քաղաքական փոխըմբռնման միջավայրում, որ խաղի կանոնները պետք է բխեն բացառապես պետական ու հանրային շահից:

Եվ 3 տարի շարունակ այդ համայնքապետերի հետ միասին սուբվենցիոն ծրագրեր ենք ներմուծել, տների ժապավեններ կտրել… Այդ պարագայում կազուս է առաջանում, եթե 3 տարի մենք արդյունավետ աշխատել ենք, էդ ո՞նց եղավ, որ հայտնվում են ընդդիմադիր քաղաքական գործչի ցուցակում, ով դատափետում և քննադատում է մեր 3 տարվա գործունեությունը»,- ասաց Պետրոսյանը:

Մանրամասները՝ տեսանյութում: