02.03.2026 | 23:40
Հայաստանի մի շարք հասցեներում էլեկտրաներգիայի անջատումներ կլինեն
Այգեստան թաղամասում կրակոցներ արձակած տղամարդը բերման է ենթարկվել ոստիկանություն․ ՏԵՍԱՆՅՈՒԹ
Հասարակություն
22.06.2021 | 19:21
Հունիսի 21-ին, ժամը 20.50-ի սահմաններում, ոստիկանության Կենտրոնական բաժնում կրակոցների վերաբերյալ հաղորդումներ են ստացվել։ Ահազանգողները հայտնել են, որ Այգեստան թաղամասից կրակոցների ձայն է լսվում։ Տեղեկացնում է ոստիկանության լրատվության եւ հասարակայնության հետ կապերի վարչությունը։
Ոստիկանության Կենտրոնական բաժնից և Մարաշի բաժանմունքից օպերատիվ խմբեր մեկնել են Այգեստան, որտեղ ձեռնարկել են հետախուզական միջոցառումներ՝ հայտնաբերելով դեպքի վայրը։ Պարզվել է՝ կրակոցները հնչել են 9-րդ փողոցում։ Շուտով հայտնի է դարձել, որ 9-րդ փողոցի թիվ 65 շենքի բնակիչներից մեկը, նախնական տվյալներով՝ ալկոհոլի ազդեցության տակ, իր բնակարանից կրակոցներ է արձակել։ 42-ամյա տղամարդը դուռը չի բացել։ Ոստիկանության ծառայողները բացատրական աշխատանք են իրականացրել, ինչը ժամեր անց արդյունք է տվել։ Արդեն հունիսի լույս 22-ի գիշերը, ժամը 4-ի սահմաններում, տղամարդը բերման է ենթարկվել ոստիկանության Կենտրոնական բաժին, որտեղից ներկայացվել է դեպքի նախաքննությունը վարող մարմնին ու տվել խոստովանական ցուցմունք։
Հետագա միջոցառումներով հայտնաբերվել է «Սայգա» մոդելի ակոսափող հրազենը, որը հաշվառված է բերման ենթարկվածի անվամբ։ Խուլիգանության հատկանիշներով քրեական գործ է հարուցվել։ Նշանակվել են փորձաքննություններ։ Հանգամանքները պարզվում են։
`
