06.06.2026 | 18:40
Ստեփանավանի տարածաշրջանում կարկուտ է տեղացել․ կան վնասներ
Բանակցությունները շարունակվում են. ԳՇ պետը՝ Գեղարքունիքում ՌԴ սահմանապահներ տեղակայելու մասին. ՏԵՍԱՆՅՈՒԹ
Քաղաքականություն
22.06.2021 | 10:47
«Գործընթացներ են ընթանում, երբ որ վերջնական որոշում լինի, տեղյակ կպահենք»,- այս մասին այսօր լրագրողների հետ զրույցում նշեց ՀՀ գլխավոր շտաբի պետը՝ անդրադառնալով դիտարկմանը, թե Գեղարքունիքի մարզպետը հայտնել է, որ Գեղարքունիքի մարզում ռուս խաղաղապահներ պետք է տեղակայվեն և զորքերը պետք է հետ քաշվեն:
Արտակ Դավթյանն ընդգծեց, որ այդ հարցի շուրջ բանակցություններ են ընթանում ռուսական կողմի հետ, մասնակցում է նաև մյուս կողմը, իսկ ժամկետի, գործընթացի բուն կատարման մասին հետագայում տեղյակ կպահեն:
Գեղարքունիքի մարզում հնարավոր զիջումների մասին հարցին Դավթյանը պատասխանեց, որ որևէ զիջում չի լինելու: «Մենք մեր տարածքում ոչ մի զիջում չենք պատրաստվում կատարել, և զիջումներ չեն լինելու»,- վստահեցրեց Զինված ուժերի Գլխավոր շտաբի պետ Արտակ Դավթյանը՝ անդրադառնալով դիտարկամանը, թե Շորժայի հատվածում հայկական կողմը խրամատներ է փորում և այդ տարածքում առկա են շենք-շինություններ, որոնք մնում են հայկական և ադրբեջանական կողմի արանքում։
«Հարցը, հույս ունենք, կկարգավորվի բանակցային գործընթացով, իսկ բանակցային գործընթացքով չկարգավորվելու դեպքում համապատասխան որոշումներ կկայացվեն»,- ասաց Դավթյանը։
Ինչ վերաբերում է հայակական տարածքում գտնվող ադրբեջանցի զինվորականների թվին, որոնք, ինչպես նախկինում հայտարարվել էր՝ 1000 է հասնում, Արտակ Դավթյանը նշեց, որ նրանց ընդհանուր թիվը մնացել է նույնը:
«Միջադեպերն այն ծավալով, որ նախկինում կային, այս պահի դրությամբ չկան, և դա առաջին հերթին պայմանավորված է բանակցային գործընթացով, որն ակտիվորեն ընթանում է»,- նշեց Դավթյանը՝ հավելելով, որ բանակցային գործընթացի փուլերի մասին չի հայտարարվում, գործընթացը չվնասելու համար։
ԳՇ պետի խոսքով՝ բանակը պատրաստ է ուժային տարբերակով խնդիրը լուծել, սակայն դա ցանկալի տարբերակ չէ՝ հաշվի առնելով պատերազմի ընթացքում հայկական կողմի կրած կորուստների քանակությունը և նոր արհավիրքներից զերծ մնալը։
Մանրամասները՝ տեսանյութում:
