Բաքուն ու Անկարան ուսումնասիրում են Ադրբեջանում ԱԹՍ-ների արտադրության կազմակերպման հնարավորությունը․ թուրք պաշտոնյա

Բաքուն ու Անկարան ուսումնասիրում են Ադրբեջանում համատեղ ռազմական արդյունաբերության արտադրանքի կազմակերպման հնարավորությունը։ Այս մասին հայտարարել է Թուրքիայի ռազմական արդյունաբերության նախարար Իսմայիլ Դեմիրը, փոխանցում են ադրբեջանական լրատվամիջոցները։

«Քանի որ Ադրբեջանի մասին ասում ենք՝ «մեկ ազգ՝ երկու պետություն», ապա մենք նույնպես պետք է գործենք  այս սկզբունքով։ Այս տեսակետից, արդեն եղած հնարավորությունները կրկնօրինակելու փոխարեն, ներդրումների ցանկացած տեսակ պետք է ուղղել հնարավորություններին, որոնք միմյանց կլրացնեն»,- ասել է Դեմիրը լրագրողների հետ զրույցում։

Նա նշել է, որ անօդաչու թռչող սարքերի արտադրության մեջ Թուրքիան ու Ադրբեջանը շարունակելու են ձգտնել «լրացնել և ուժեղացնել միմյանց»։

«Օրինակ՝ վերցնենք անօդաչու սարքերը։ Մենք կարծում ենք, որ երկու երկրները համագործակցելու են այն ձևով, որ լրացնեն ու ամրացնեն միմյանց։ Ռազմական արդյունաբերությունն այն ոլորտն է, որը պահանջում է նշանակալի ռեսուրսներ։ Մենք պետք է շատ արդյունավետորեն օգտագործենք մեր ռեսուրսները։ Կրկնվելու փոխարեն՝ մեր ներդրումները պիտի նպաստեն երկու երկրների զարգացմանը»,- ասել է թուրք պաշտոնյան։

Ի դեպ, Թուրքիայի նախագահ Ռեջեփ Թայիփ Էրդողանը հայկական օկուպացված Շուշի քաղաք կատարած այցի ընթացքում հայտարարել էր, որ Ադրբեջանում կառուցվելու է գործարան՝ տեխնոլոգիաների և ռազմական արդյունաբերության ապրանքների համատեղ արտադրության համար։

Էմմա Չոբանյան