Թբիլիսին պատրաստ է աշխատել Վրաստան-Ադրբեջան-Հայաստան եռակողմ ձևաչափով

Թբիլիսին պատրաստ է աշխատել Վրաստան-Ադրբեջան-Հայաստան եռակողմ ձևաչափով՝ աշխարհաքաղաքական կարևոր նախագծերի իրականացման համար։ Այս մասին հայտարարել է երկրի փոխվարչապետ, ԱԳՆ ղեկավար Դավիթ Զալկալիանին, գրում է «Գրուզիա օնլայնը»։

Ելույթ ունենալով Թուրքիայում կայացած դիվանագիտական ֆորումի ժամանակ՝ Զալկալիանին նշել է, որ Ադրբեջանն ու Թուրքիան Վրաստանի ռազմավարական գործընկերներն են: Նա նաև շեշտել է Հայաստանի հետ պատմական և բարեկամական կապերը:

«Մեր առջև այսօր շատ հնարավորություններ կան։ Մեր տարածքով են անցնում նավթամուղներ և գազամուղներ»,- հիշեցրել է Զալկալիանին։

Նա ընդգծել է, որ սա գործնականում համագործակցության ցուցադրություն է։ Զալկալիանին նշել է, որ Թբիլիսին պատրաստ է համագործակցել Վրաստան-Ադրբեջան-Հայաստան ձևաչափով՝ տարածաշրջանային համագործակցության տեսանկյունից։ Նախարարն ընդգծել է, որ նման համագործակցության ամրապնդումն իր երկրի առաջնահերթությունն է:

Այս համատեքստում Զալկալիանին նշել է հատուկ նախագծերի իրականացման կարևորությունը, որոնք կնպաստեն տնտեսական համագործակցության ընդլայնմանը, տրանսպորտային կապերին Կասպից և Սև ծովերի ներուժի օգտագործման տեսանկյունից:

Նա նաև շեշտել է, որ առանց կայունության անհնար է խոսել զարգացման և բարգավաճման մասին: Նախարարը կողմերին հորդորել է ակտիվ աշխատել՝ չնայած սահմանափակ ռեսուրսներին: Զալկալիանին անդրադարձել է նաև Վրաստանի վարչապետի օժանդակությամբ Հայաստանի և Ադրբեջանի միջև ձեռք բերված հումանիտար համաձայնագրին:

Տաթև Ֆռանգյան