ԵՐԵՎԱՆԻ ԺԱՄԱՆԱԿՈՎ․ Քանի՞ հենակետ կարելի էր կառուցել ագրեսիվ քարոզի համար ներդրած գումարներով. Սուրեն Շահվերդյան․ ՏԵՍԱՆՅՈՒԹ

«Հունիսի 20-ի խորհրդարանական ընտրություններից հետո նոր ճգնաժամ և պառակտում է սկսվելու, հիասթափություն է լինելու, և Աստված մի արասցե, որ արյուն թափվի. ցավոք, դրա նախադրյալները կան: Թե՛ Նիկոլ Փաշինյանի, թե՛ Ռոբերտ Քոչարյանի աջակիցներն այդ առումով «մարտական» են տրամադրված, փողոցի տղաներն էլ կենտրոնացրել են ուժերը՝ մի մասը իշխանության գալու, մյուս մասը՝ իշխանությունը պահելու նպատակով»,- Factor.am-ի հետ զրույցում նման տեսակետ է հայտնում ռեժիսոր, բեմադրիչ, «Հայ ազգային կոնգրես» կուսակցության նախընտրական ցուցակով պատգամավորի թեկնածու Սուրեն Շահվերդյանը:

Անդրադառնալով ՀՀ վարչապետի պաշտոնակատար Նիկոլ Փաշինյանի գործելաոճին` մեր զրուցակիցը նկատում է. «Նա ասում է` այն փայտիկը, որ մեզ տվել եք, կախարդական չէր, հիմա կրկին փայտիկ տվեք, և մենք պետության բոլոր խնդիրները կլուծենք: Այնինչ, Փաշինյանը իր առջև մեկ խնդիր է դրել` պահել իշխանությունը»:

Ինչ վերաբերում է ՀՀ երկրորդ նախագահ Ռոբերտ Քոչարյանին և նրա աջակիցներին, բեմադրիչը շեշտում է. «Մարդիկ մոռացել են բոլոր սպանությունները, որ կատարվել են նախկինում, բռնապետական համակարգը, որ տիրում էր մեր երկրում: Առհասարակ, այս երկու ուժերն էլ անսպառ միջոցներ են ծախսում ընտրվելու համար, բայց քանի՞ հենակետ կարելի էր կառուցել ագրեսիվ քարոզի համար ներդրած գումարներով»:

Սուրեն Շահվերդյանի կարծիքով` մեր հանրությունն այսօր համախմբվել է ատելության շուրջ, և դա շատ ցավալի է. «Մենք համախմբվում ենք ընդդեմ ինչ-որ մեկի, ոչ թե հանուն ինչ-որ բանի: Սա խորը ողբերգություն է, գլխավոր դերակատարները խեղկատակներ են, որոնց հանդիսատեսը բարձր ծափահարում և դափնիներ է շնորհում»:

Հարցազրույցն ամբողջությամբ՝ տեսանյութում:

Աննա Բաբաջանյան