Նախկինում կաշառքով, ԽԾԲ-ով, «տասովշիկությամբ» ընտրողները հիմա ծրագրերով են հետաքրքրվում․ Սուրեն Սահակյան․ ՏԵՍԱՆՅՈՒԹ

Արտահերթ ընտրությունների նախընտրական պայքարի, ծրագրերի և համագործակցության մասին Factor TV-ի տաղավարում զրուցել ենք ՔՈ կուսակցության նախընտրական ցուցակը գլխավորող Սուրեն Սահակյանի հետ։

-Ունենք ընտրապայքարին մասնակցող 20-ից ավելի ուժեր։ Համեմատաբար փոքր ընտրազանգված ունեցող ուժերն ինչո՞ւ չեն միավորվում։

-Դրա համար մի քանի պատճառ կա։ Նախ՝ ժամանակն էր քիչ։ Ոչ ոք չէր հավատում, որ ընտրությունները լինելու են, մինչև եկավ, հասավ Փաշինյանի հրաժարականի պահը։ Փաշինյանի հրաժարականից հետո սպասում էին, որ այս ընթացքում մի բան կլինի, ընտրությունները կչեղարկվեն։ Մինչև մայիսի 12-ին ադրբեջանցիները եկան Սև լճի տարածք, բոլորը սպասում էին, որ պատերազմ կլինի, ոչ ոք լուրջ չէր պատրաստվում։

Այս ընտրություններում մարդիկ փորձելու են դիրքավորվել հաջորդ ընտրությունների համար։ Եվ շատ մեծ ուժերով հնարավոր չէ դիրքավորվել։ Ամեն մեկը իր յուրահատկությունը պետք է ընդգծի, իսկ միավորումները, դաշինքներն այդ յուրահատկությունները լղոզում են։

-Ինչպե՞ս անել, որ մարդիկ ընդհանրապես ծրագրերին ծանոթանան, ծրագրերով որոշում ընդունեն։

-Մենք անընդհատ խոսում ենք դրա անհրաժեշտության մասին, և այդ խոսակցությունն ահագնանում է։ Այսինքն՝ այն թեզերը, որ մենք տարածում էինք ժամանակին ծրագրային ընտրությունների մասին, այսօր ավելի ընդլայնված, ընդգրկուն են։

-Դրա սաղմերը տեսնո՞ւմ եք։

-Պատերազմից հետո մեզ թվում էր՝ ընդհանրապես ծրագրային չի լինելու, բայց նույնիսկ շրջանակները, որոնք նախկինում կաշառքով, ԽԾԲ-ով կամ «տասովշիկությամբ» էին ընտրում, իրենք գալիս են, ասում՝ եթե ձեր ծրագրերը մեզ դուր գան, մենք, նաև մեր ազդեցության գոտիները, կընտրենք ձեզ։ Սա մեզ համար էլ էր զարմանալի, որ նույնիսկ այդպիսի մարդիկ կարիք ունեն ընտրության հիմքում ծրագրերին նայելու։

-Կա՞ն ուժեր, որոնց հետ առհասարակ բացառում եք համագործակցությունը։

-Ազգային ժողով անցնելու դեպքում այս պարագայում մենք բացառում ենք ատելության խոսք սերմանող որևէ ուժի հետ համագործակցությունը։ Դրանք են «Քաղաքացիական պայմանագիր» կուսակցությունը, «Պատիվ ունեմ» դաշինքը և «Հայաստան» դաշինքը։

Հարցազրույցն ամբողջությամբ՝ տեսանյութում։

Գարիկ Հարությունյան