30.10.2026 | 19:08
Արծվիկ Մինասյանը և Շուշան Սարգսյանը՝ Մրցակցության պաշտպանության հանձնաժողովի անդամներ
100 000 դոլար արժողությամբ գրիչների հավաքածու․ ինչ գույք ու եկամուտներ ունի Արամ Սարգսյանը
Քաղաքականություն
15.06.2021 | 14:17
Factor.am-ը շարունակում է արտահերթ խորհրդարանական ընտրություններին մասնակցող կուսակցությունների և կուսակցությունների դաշինքների ընտրական ցուցակի առաջին երեք տեղերը զբաղեցնող անձանց գույքի և եկամուտների մասին հայտարարագրերը ներկայացնող շարքը։
«Հանրապետություն» կուսակցության վարչապետի թեկնածու, կուսակցության նախագահ Արամ Սարգսյանի՝ ԿԸՀ-ին ներկայացրած հայտարարագրում որպես անշարժ գույք նշված է Արարատ գյուղում 0․099 հա հողատարածք և Երևանում՝ 130 քմ տարածք։
Որպես շարժական գույք Սարգսյանը հայտարարագրել է 2 ավտոմեքենա՝ 2017 թվականի Hyundai Tuscani 2.0 և 1994 թվականի Mercedes-Benz G 350:
Սարգսյանը նաև 3 թանկարժեք գույք է հայտարարգրել․ 100 000 դոլար արժողությամբ գրիչների հավաքածու, 25 000 դոլար արժողությամբ ժամացույց և 16-րդ դարի նկար, որի արժեքը, սակայն, գնահատված չէ։ Հիշեցնենք, որ թանկարժեք է համարվում 8 մլն դրամից ավելի արժեքով շարժական գույքը։
«Հանրապետություն» կուսակցության նախագահը «Գալիք» ՍՊԸ-ից 28 միլիոն դրամի եկամուտ է ստացել։ Նշված ՍՊԸ-ից նա ունի 50% բաժնեմաս։ 45% բաժնեմաս ունի «Հատուկ ցեմենտ» ՍՊԸ-ից, ևս 25%` «Կավաշեն» ՍՊԸ-ից։
Հայտարարագիրը ներկայացնելու օրվա դրությամբ Սարգսյանն ունեցել է 16 միլիոն դրամ, 20 000 դոլար և 5000 եվրո դրամական միջոցներ։
Նշենք, որ 1999-2000 թթ․ վարչապետի պաշտոնը զբաղեցրած Արամ Սարգսյանն այս պահի դրությամբ,ըստ հայտարարագրի, գործազուրկ է։
Արփի Հակոբյան
