15.01.2025 | 17:30
Դատախազությունը պահանջում է դատավոր Անի Հարությունյանից բռնագանձել 17 անշարժ գույք, շուրջ 1 միլիարդ դրամ
Մի հատվածից գոռում են՝ «հողատու», մյուսից՝ «դավաճան», այդպիսի խորհրդարան եք ուզո՞ւմ. Մարուքյան. ՏԵՍԱՆՅՈՒԹ
Քաղաքականություն
11.06.2021 | 12:06
Պատկերացնո՞ւմ եք խորհրդարան, որի մի հատվածից գոռում են՝ «հողատու», մյուսից՝ «դավաճան». այդպիսի խորհրդարան եք ուզո՞ւմ: Մենք արտահերթ ընտրություններ ենք հայտարարել, որ նման խորհրդարան ձևավորե՞նք… Քաղաքական ուժերը պետք է իրենց տարաձայնությունները մի կողմ դնեն և միավորվեն երկիրն այս վիճակից հանելու համար։ Այս մասին այսօր լրագրողների հետ զրույցում ասաց «Լուսավոր Հայաստան» կուսակցության նախագահ Էդմոն Մարուքյանը։
«Երբ մայիսի 12-ին թուրքերը մտան մեր տարածք և մինչև էսօր դուրս չեն գալիս, մենք ասացինք՝ մենք ամեն ինչ մի կողմ ենք դրել, ասել ենք՝ քանի դեռ թշնամին մեր տարածքում է, եկեք բոլորով թշնամու դեմ պայքարենք, հանենք մեր տարածքից։ Եվ մեր քարոզարշավի հռետորաբանությունը նաև դա ունի իր մեջ։ Թուրքերը Հայաստանի տարածքում նախիր են գողանում, մարդ են գերեվարում, մեր սուվերեն տարածք են մտել, դուրս չեն գալիս, արտգործնախարարություն չունենք, բանակցություններ չկան, էս պայմաններում ճոխությո՞ւն չեն իրար ոչնչացնելու, ոտնատակ տալու, հունիսի 21-ին ժողովրդին հրապարակ հանելու կոչերը»,- նշեց նա։
Ըստ Մարուքյանի՝ ընտրությունների արդյունքում ոչ մի ուժ 51 տոկոս ձայն չպետք է հավաքի, հակառակ դեպքում իրավիճակը երկրում կսրվի։ «Որ ուժը 51 տոկոս հավաքեց, էն մյուս ուժն ասելու է՝ կեղծվել են ընտրությունները, ժողովրդին հանելու է բերի հրապարակ, ցնցումներ են սկսվելու երկրի ներսում, թուրքերն էլ ժամացույցին նայելով՝ սպասում են, թե երբ է դա տեղի ունենալու»,- նշեց նա։
Մարուքյանի խոսքով՝ եթե խորհրդարանը ձևավորվի իրենց պատկերացրած օրակարգով, որը համերաշխության օրակարգ է, «Լուսավոր Հայաստանը» իր ամբիցիաները մի կողմ կդնի, եթե պետք է, վարչապետի թեկնածու չի առաջադրի։ «Բայց բոլոր ուժերից դուրս պատրաստ ենք վարչապետի թեկնածու ընտրել, որը համազգային հաստատում կունենա, և ձևավորել ազգային համաձայնության կառավարություն։ Մենք ոչ մի ուժի չենք միանալու առանձին վերցված, որ այդ ուժը գա էն մյուս ուժերին ոչնչացնելու։ Մեր օրակարգում դա չկա, կամ բոլոր ուժերով միանում ենք, երկիրն էս վիճակից հանում ենք, կամ տեղի կունենա ընտրությունների երկրորդ փուլ։ Որպեսզի այդ երկրորդ փուլը տեղի չունենա, ևս 28 օր երկիրը ցնցումների մեջ չլինի, պետք է ԼՀԿ-ն ժողովրդից լիազորություն ստանա՝ համերաշխության և ազգային միասնության կառավարություն ձևավորելու։ Եթե այս օրակարգը հաղթում է, հունիսի 21-ին ընդդիմություն չենք ունենալու, կարելի է մի երեք տարի չունենալ ընդդիմություն, որովհետև ընդդիմություն պետք է ունենալ նորմալ պայմաններում, իսկ էն պայմաններում, որ երկիրդ գրավելով գալիս են, ընդդիմությունը պետք է իր ներդրումն ունենա այդ ամենում։ Երեք-չորս տարի կարելի է ունենալ ազգային համաձայնության կառավարություն, որ երկիրն էս վիճակից հանի»,- ընդգծեց Մարուքյանը:
Մանրամասները՝ տեսանյութում:
