Հայտնի է Բաքվում պահվող շիրակցի 13 ռազմագերիների դատավարության նիստի օրը

Բաքվի կողմից 13 շիրակցի ռազմագերիների նկատմամբ հարուցված շինծու քրեական գործով դատավարության օրը հայտնի է։ Ադրբեջանական լրատվամիջոցների հաղորդմամբ՝ նախնական դատական նիստը տեղի կունենա Բաքվի ծանր հանցագործությունների դատարանում հունիսի 22-ին՝ ժամը 12։00-ին։ Գործը քննելու է դատավոր Էլդար Իսմայիլովը։

Հիշեցնենք, որ հայ գերիներին Բաքուն մեղադրում է, իբր, Ադրբեջանի տարածք թափանցելու և ահաբեկչական, դիվերսիոն գործողություններ իրականացնելու մեջ։

Նախօրեին էլ Ադրբեջանի Պետական անվտանգության ծառայությունն ու Գլխավոր դատախազությունը համատեղ հայտարարություն էին տարածել այս առնչությամբ։ Քննությամբ, իբր, պարզվել է, որ 2020 թվականի նոյեմբերի 26-27-ը Հայաստանի մի խումբ քաղաքացիներ անօրինական կերպով հատել են Ադրբեջանի պետական սահմանը և մարտական դիրքեր գրավել Հադրութի հյուսիսարևմտյան մասի անտառային գոտում, ինչպես նաև, իբր, մինչև 2020թ․ դեկտեմբերի 13-ը զինված հարձակումներ են գործել այդտեղ գտնվող հաստատությունների, առանձին մարդկանց վրա՝ հասարակական անվտանգությունը խախտելու և բնակչության շրջանում խուճապ ստեղծելու համար։

Ընդհանուր առմամբ, շինծու քրեական գործեր են հարուցվել շիրակցի 27 ռազմագերիներեի նկատմամբ։ 14 ռազմագերու գործերով նախնական դատական նիստն էլ Բաքվի ծանր հանցագործությունների դատարանում տեղի կունենա հունիսի 16-ին։

Հիշեցնենք՝ Հադրութի Հին Թաղեր ու Խծաբերդ բնակավայրերում դեկտեմբերին, ռազմական գործողությունների ավարտից հետո, Շիրակի մարզի տարբեր համայնքների 62 զինվորականներ գերեվարվեցին Ադրբեջանի կողմից։ Նրանց նկատմամբ Ադրբեջանի իշխանությունները տարբեր քրեական գործեր են հարուցել, որակել են դիվերսանտներ ու հրաժարվում են վերադարձնել։ 8 շիրակցիներ արդեն վերադարձել են․ հունվարի 28-ին Հայաստան վերադարձավ 5 շիրակցի գերի, փետրվարի 8-ին՝ ևս 5-ը, որոնցից 3-ը՝ Գյումրիից։ Գերիների վերջին խումբը՝ 3 ռազմագերի, Հայաստան վերադարձավ մայիսի 4-ին։ Նրանցից մեկը Շիրակի մարզից է։ Մյուս գերիները շարունակում են մնալ Ադրբեջանում։

Էմմա Չոբանյան