Քաղաքականություն
08.06.2021 | 14:56Ազգային ժողովրդավարական բևեռը նախընտրական ծրագրում առաջ է քաշում հարցը, որ Հայաստանը պետք է հրաժարվի ՀԱՊԿ-ից և դիմի ԱՄՆ-ին՝ ՆԱՏՕ-ի ոչ անդամ հիմնական դաշնակցի կարգավիճակ ստանալու համար։ Այս մասին այսօր հրավիրված ասուլիսում նշեց ԱԺԲ անդամ Արա Պապյանը։
Նրա խոսքով՝ մեր անվտանգության համակարգի միջուկը հայ-ռուսական հարաբերություններն են ու դրանից ածանցվող ՀԱՊԿ-ը. «Մենք տարիներ ի վեր ասում էինք, որ դրանք այլևս չեն աշխատում, որովհետև կարող է անվտանգության համակարգ գործել, եթե կա շահերի ընդհանրություն։ Ռուսաստանի և Հայաստանի շահերը հակոտնյա են, և պատերազմը դա ցույց տվեց, որ մենք մեր դաշնակիցներից ոչ միայն աջակցություն չստացանք, այլ ընդհակառակը։ Հետևաբար, անվտանգության նոր համակարգ պետք է ստեղծվի, ոչ թե վերակենդանացվի»:
ԱԺԲ-ն առաջարկում է, որ Հայաստանը դիմի ԱՄՆ-ին՝ ՆԱՏՕ-ի ոչ անդամ հիմնական դաշնակցի կարգավիճակ ստանալու համար։ «Մենք մեր չափով այդ հարցերը քննարկում ենք ԱՄՆ հետ, եթե խորհրդարանում ունենանք մեծամասնություն, շատ ավելի լուրջ կարող ենք քննարկել այդ հարցը։ Միակ փրկությունը այսօր սա է։ Ակնհայտ է, որ Ռուսաստանի համար Թուրքիան և Ադրբեջանը շատ ավելի կարևոր երկրներ են, այսինքն՝ հանուն հայերի իրենք թուրքերի հետ հարաբերություն չեն փչացնի»,- նշեց Պապյանը՝ հավելելովՆԱՏՕ-ի ոչ անդամ հիմնական դաշնակցի կարգավիճակն ունի տարբեր դրսևորումներ՝ սկսած քաղաքական երկխոսությունից, համագործակցությունից, մինչև ռազմական ներկայություն։
Մանրամասները՝ տեսանյութում:
