14.01.2026 | 19:29
Պապիկյանը հետևել է սպայական կազմերի ատեստավորման գործընթացի կրակային փուլին
«Կան կեղծ հայտարարագրեր, որտեղ անձը որոշ դեպքերում ներկայացված է որպես բոմժ»․ Նաիրա Զոհրաբյան
Քաղաքականություն
07.06.2017 | 15:03
Կոռուպցիայի կանխարգելման հանձնաժողովի մասին ելույթ ունենալով «Ծառուկյան» խմբակցության պատգամավոր Նաիրա Զոհրաբյանն ընթերցեց Բարձրաստիճան պաշտոնատար անձանց էթիկայի հանձնաժողովի գործառույթները։
«Բարձրաստիճան պաշտոնատար անձանց գույքի, եկամուտների և փոխկապակցված անձանց հայտարարագրերի ռեեստրի վարումը, դրանց վերլուծությունը և հրապարակումը, ինչպես նաև օրենքով սահմանված դեպքերում բարձրաստիճան անձանց շահերի բախման և էթիկայի կանոնների խախտումների բացահայտումը և դրանց կանխարգելմանն ու վերլուծմանն ուղղված առաջարկությունների ներկայացումը։ Հիշեցնեմ, որ այս հանձնաժողովը գործում է 2012 թվականի հունվարի 9-ից։ Հիմա հարց եմ ուզում տալ՝ ձեզնից որևէ մեկը հիշո՞ւմ է որևէ դեպք, երբ այս հանձնաժողովը շահերի բախման կամ ունեցվածքի ոչ համապատասխանության դեպքում որևէ խնդիր բարձրացրած լինի»,- ասաց նա՝ դիմելով խորհրդարանին։
Զոհրաբյանի վստահեցմամբ՝ քանի դեռ ՀՀ-ում շատերի համար պաշտոնը հարստացման հիմնական «ֆորմուլան է», լինելու են կեղծ հայտարարագրեր։«Որտեղ անձը որոշ դեպքերում ներկայացված է որպես բոմժ, բայց իրականում մենք տեսնում ենք նրա ռեալ ունեցվածքը»,- ասաց նա՝ նկատելով, որ հանձնաժողովը օրենքով իրեն տրված գործառույթները չի կատարել։
Զոհրաբյանը հավելեց, որ «Ծառուկյան» դաշինքի առաջարկը մնում է ուժի մեջ «ընդդիմությունը պիտի իրավունք ունենա առաջադրելու թեկնածու»։ «Ես կարծում եմ՝ մենք կարող ենք ճիշտ ձևակերպում գտնել, որ առաջադրման փուլում ընդդիմությունն ունենա մասնակցություն»,- եզրափակեց նա։
Սեդա Ղուկասյան
