Կառավարության ամենաանհեթեթ որոշումները․ մեծատառ Ա-ն փոքրատառ դարձնելու փշոտ ճանապարհը

Կառավարության նիստերը շուտով դռնփակ են լինելու. սա նշանակում է, որ հանրությունը զրկված կլինի գործադիրի որոշումներին ծանոթանալու երջանկությունից: Այսուհետ որոշումների մասին կտեղեկացնեն ընտրողաբար, որը կամենան. իսկ այդ որոշումները հաճախ այնքան անտրամաբանական ու զավեշտալի են, որ երբեմն դժվար է հավատալ, որ այն կայացնելու համար տարբեր տրամաչափի մի քանի տասնյակ պաշտոնյա հավաքվում է նիստերի դահլիճում:

Էներգետիկ ենթակառուցվածքների և բնական պաշարների նախարարությունը, օրինակ, մշակել է մի որոշման մեջ փոփոխություն, որտեղ «վար» բառը փոխում է «վառ» բառով, «var» բառը՝ «VAr» բառով, «վար» բառը՝ «ՎԱռ» բառով: «ագ» բառի «ա»-ն էլ դառնում է մեծատառ: Եթե ընթերցողն այս ամենից ոչինչ չհասկանա, դա դեռ չի նշանակում, թե կառավարությունը որոշել է այբուբենի հետ խաղալ: Դա խիստ մասնագիտական է, ինչն ընկալելու համար պետք է կառավարության անդամ լինել:

Կամ, ասենք, պետական եկամուտների կոմիտեն որոշումներից մեկի նախաբանում «4-րդ մասը» բառերը փոխարինում է «1-ին մասը» բառերով և կարծիք ստանալու համար դիմում Ֆինանսների, Տնտեսական զարգացման և ներդրումների, Արդարադատության նախարարություններին: Առարկություն չկա, դե «մաս»-ը «մաս» է, ի՞նչ տարբերություն՝ 1-ին, թե՝ 4-րդ: Բայց արդարադատության նախարարությունը խորանում է որոշման ծալքերում ու հայտնաբերում աններելի սխալ՝ «հրապարակման օրվան հաջորդող օրը» բառերը պետք է փոխվի «հրապարակմանը հաջորդող օրվանից» բառերով: Եվ այսպես շարունակ:

Թվում է, թե նախարարների վրա «պլան» է դրված՝ ամեն նիստի մի քանի որոշում բերել: Իրենք էլ զբաղված մարդիկ են, հո չե՞ն ընկնելու նոր որոշումներ մշակելու հետևից: Ուստի նախորդ որոշումներն են նայում՝ ո՞ր տառը մի քիչ չի սազում տեքստին, ո՞րն արժե մի քիչ մեծացնել … ու ստանում ենք կառավարության՝ բոլորովին թարմ որոշումներ: