Կլուսավորվի ողջ Գյումրին․ Եվրամիությունը մոտ 2 միլիոն եվրոյի դրամաշնորհ է հատկացրել

Եվրամիությունը մոտ 2 միլիոն եվրոյի դրամաշնորհ է հատկացրել Գյումրու բոլոր փողոցներում խնայողական լամպեր ձեռք բերելու ու քաղաքի լուսավորության խնդիրը վերջնականապես լուծելու համար։ Այս մասին Factor.am-ի զրույցում տեղեկացրեց Գյումրու քաղաքապետ Սամվել Բալասանյանը։

«Գյումրու լուսավորության համար երրորդ մրցույթն ենք հայտարարելու։ Մոտ 2 միլիոն եվրո հատկացվեց Եվրամիության կողմից՝ որպես դրամաշնորհ։ Կունենանք խնայողական լամպերով լուսավորված քաղաք, հնարավորություն կլինի ոչ թե կեսգիշերին անջատել փողոցների լուսավորությունը, խոսքս, իհարկե, քաղաքի ոչ կենտրոնական հատվածների մասին է, այլ ամբողջ գիշեր կկարողանանք լուսավորություն ունենալ մեր ողջ քաղաքում։ Ծրագրի իրականացման դեպքում նույն գումարը կծախսենք, ինչ-որ հիմա ծախսում ենք այս ժամանակահատվածի համար», -ասաց քաղաքապետը։

Տեղեկացանք, որ կա նաև քաղաքում ֆոտովոլտային վահանակներ տեղադրելու սուբվենցիոն ծրագիր: «Սա շատ կարևոր ծրագիր է, բոլոր ենթակառույցներում ֆոտովոլտային վահանակներ ենք տեղադրելու․ մոտ 300 միլիոն դրամը մենք ենք տալու, 400 միլիոնը՝ կառավարությունն է հատկացնում։ Սա նախագծային փուլում է, շուտով շինարարի մրցույթ կհայտարարենք, և դրանից հետո կսկսվեն շինարարական աշխատանքներ ու կունենանք լուրջ խնայողություն էլեկտրաէներգիայի համակարգում»,- ներկայացրեց քաղաքապետը։

Ֆոտովոլտային վահանակները կտեղադրվեն քաղաքապետարանի ենթակայության տակ գործող բոլոր կառույցների, ինչպես նաև քաղաքապետարանի շենքի տանիքում։

Արմիկ Մովսիսյան