20.12.2025 | 20:00
100,000 ռուբլի՝ ՀՀ-ում լրտեսության համար․ ՌԴ քաղաքացիները Հայաստանում տվյալներ են հավաքել․ ՏԵՍԱՆՅՈՒԹ
«Հանրայինը» մոտ կես միլիարդ դրամանոց բյուջեով լրատվական ալիք կունենա. «Հ2»-ը և «Փաստինֆո»-ն ևս պայքարում են մայրաքաղաքում հեռարձակվելու համար
Քաղաքականություն
30.05.2021 | 19:35
Հունիսի 4-ին Հեռուստատեսության և ռադիոյի հանձնաժողովում նախատեսված է մայրաքաղաքային մեկ հեռուստաալիքի հեռարձակման կապուղու մրցույթ, որի հեռարձակումն իրականացվելու է հանրային մուլտիպլեքսի միջոցով: Այս կապուղու համար պայքարում են երեք ընկերություն:
Հայտնի է, որ Հանրային հեռուստառադիոընկերության խորհուրդը, «Առաջին ալիքին» զուգահեռ, ցանկանում է հեռարձակել լրատվական հեռուստաալիք, որը 24-ամյա լրատվություն է ապահվելու: Սա ինչ-որ առումով հակակշիռ է լինելու ընդդիմադիրներին պատկանող հեռուստաընկերություններին, որոնք սուր քննադատում են կառավարող ուժի քաղաքականությունը:
Մեզ հայտնի դարձավ, որ որոշում կա այս լրատվամիջոցի հեռարձակումը սկսել քարոզարշավի մեկնարկին զուգահեռ:
Կապուղու մյուս հավակնորդը Ռոբերտ Քոչարյանի մերձավոր շրջապատից գործարար Սամվել Մայրապետյանին պատկանող «Հայկական երկրորդ» հետուստաալիքն է: Հիշեցնենք՝ այս լրատվամիջոցը մի քանի ամիս առաջ դիմել էր հանրապետական սփռման իրավունք ստանալու համար, բայց հանձնաժողովը վերահեռարձակվելու իրավունք չէր տվել: Հ2-ը դատական կարգով վիճարկել է այդ որոշումը։
Մայրաքաղաքում և հարակից մի քանի մարզերում հեռարձակվելու հայտ է ներկայացրել նաև «Փաստինֆո» գործակալությունը: Այս լրատվամիջոցը ղեկավարում է Սոնա Տռուզյանը, որը երկար տարիներ ՔԿ նախկին նախագահ Աղվան Հովսեփյանի խոսնակն էր: Մի շարք հանգամանքներ հաշվի առնելով, այնուամենայնիվ, մինչ մրցույթի արդյունքների հայտնի դառնալը, կարող ենք ենթադրել, որ այս երեք ընկերություններից կապուղին բաժին է հասնելու հանրային հեռարձակողին:
Բանն այն է, որ ապրիլի 15-ի կառավարության 570-Ն որոշմամբ՝ հանրային հեռարձակողի խորհրդին պահուստային ֆոնդից 427.7 միլիոն դրամ է հատկացվել։ Որոշման մեջ նշված է, որ նպատակը «Հայաստանի հանրային հեռուստաընկերություն» ՓԲ ընկերության լրատվական հեռուստաալիքի ստեղծումն է:
Ի դեպ, այս՝ շուրջ կես միլիարդ դրամը հատկացվել է հարկատուների «աչքից հեռու»՝ չզեկուցվող նախագծով: Բացի այս՝ Հանրային ՀԸ-ի տարածքում մի քանի ամիս է՝ մեկնարկել են լրատվական հեռուստաալիքի տաղավարների պատրաստման աշխատանքները, լրատվամիջոցը նաև համալրում է կադրային բազան: Ուշագրավ է, որ Ֆինանսների նախարարությունը կառավարությանը հորդորել է լրատվական ալիքի համար շուրջ կես միլիարդ դրամ ծախսելու գաղափարից հետ կանգնել:
«Առաջարկում ենք զերծ մնալ նոր պարտավորությունների ստանձնումից, քննարկումների արդյունքներով նոր պարտավորության ընդունման դեպքում՝ վերջինիս իրականացման հարցը քննարկել ոլորտային/ծախսային առաջնահերթությունների վերանայման և ըստ այդմ՝ պետական բյուջեով նախատեսված ընդհանուր հատկացումների շրջանակներում»,- նշված է նախարարության որոշման նախագծի առարկությունների բաժնում:
Ֆինանսների նախարարությունը, միաժամանակ, ուշադրություն է հավիրել այն հանգամանքի վրա, որ Հայաստանի 2022-2024 թվականների միջնաժամկետ ծախսերի ծրագրի և 2022 թվականի պետական բյուջեի հայտը գերազանցում է ի կատարումն ՀՀ վարչապետի մոտ 2021 թվականի հունվարի 29-ին կայացած խորհրդակցության N Վ/06-2021 արձանագրության 3-րդ կետի՝ ՀՀ Ֆինանսների նախարարության կողմից հանրային հեռարձակողի խորհրդին տրամադրված 2022-2024 թվականների ծախսային կողմնորոշիչ (վերանայված) չափաքանակները 2022 թվականին՝ 1,729.3 մլն դրամով, 2023-2024 թվականներին յուրաքանչյուր տարի՝ 1,400.8 մլն դրամով, այդ թվում՝ վերը նշված նոր հեռուստաալիքի ստեղծման և գործարկման մասով յուրաքանչյուր տարի՝ 1,340.0 մլն դրամով։
Նարեկ Կիրակոսյան
