Հայկ Մարությանի որոշումներով դպրոցի ու կրթահամալիրի տնօրեններ են ազատվել պաշտոնից

Երևանի քաղաքապետ Հայկ Մարությանը մայիսի 17-ի 18-ին որոշումներ է ստորագրել, որոնց համաձայն ուսումնական հաստատությունների տնօրեններ են ազատվել պաշտոնից։

Մայիսի 17-ի որոշման մեջ ասվում է․

«Ղեկավարվելով աշխատանքային օրենսգրքի 109-րդ հոդվածի 1-ին մասի 2-րդ կետով, 111-րդ հոդվածի 1-ին և 2-րդ մասերով, հիմք ընդունելով Ա. Ասլանյանի հետ 2016թ. մայիսի 16-ին կնքված աշխատանքային պայմանագրի 4-րդ գլխի 4.1 կետի «ա» ենթակետը՝

1.Անուշ Կամոյի Ասլանյանին՝ 2021 թվականի մայիսի 17-ից ազատել «Երևանի Դանիել Վարուժանի անվան հ.89 հիմնական դպրոց» պետական ոչ առևտրային կազմակերպության տնօրենի պաշտոնից՝ լուծելով նրա հետ 2016 թվականի մայիսի 16-ին կնքված աշխատանքային պայմանագիրը:

2.«Երևանի Դանիել Վարուժանի անվան հ.89 հիմնական դպրոց» պետական ոչ առևտրային կազմակերպության տնօրենի պարտականությունների կատարումը ժամանակավորապես դնել նույն կազմակերպության ուսումնական աշխատանքների գծով տնօրենի տեղակալ Կարեն Գևորգյանի վրա՝ մինչև սահմանված կարգով մրցույթի արդյունքում հաղթող ճանաչված մասնակցի կողմից այն զբաղեցնելը»:

Մայիսի 18-ի որոշման մեջ ասվում է․

«Ղեկավարվելով աշխատանքային օրենսգրքի 109-րդ հոդվածի 1-ին մասի 2-րդ կետով, 111-րդ հոդվածի 1-ին և 2-րդ մասերով, հիմք ընդունելով Գ. Սանոյանի հետ 2017թ. հունվարի 30-ին կնքված աշխատանքային պայմանագրի 4-րդ գլխի 4.1 կետի «դ» ենթակետը՝

1.Գոհար Սարգսի Սանոյանին՝ 2021 թվականի մայիսի 19-ից ազատել Երևանի «Հակոբ Կոջոյան» կրթահամալիր պետական ոչ առևտրային կազմակերպության տնօրենի պաշտոնից՝ լուծելով նրա հետ 2017 թվականի հունվարի 30-ին կնքված աշխատանքային պայմանագիրը:

2.Երևանի «Հակոբ Կոջոյան» կրթահամալիր պետական ոչ առևտրային կազմակերպության տնօրենի պարտականությունների կատարումը ժամանակավորապես դնել նույն կազմակերպության ուսումնական աշխատանքների գծով տնօրենի տեղակալ Մարիետա Մանասյանի վրա՝ մինչև սահմանված կարգով մրցույթի արդյունքում հաղթող ճանաչված մասնակցի կողմից այն զբաղեցնելը»: