Հայկական դուդուկի հնչյունները յուրահատուկ են, դրանք կարող եմ տարբերել միանգամից. Ժակլին Բաղդասարյան. ՏԵՍԱՆՅՈՒԹ

Հայկական աշուղական երգերի յուրահատուկ մատուցում՝ համեմված ֆրանսիական երաժշտության մոտիվներով, թովիչ ձայնային տվյալներ․ սա է «Լադանիվա» խմբի՝ արագորեն ճանաչում ձեռք բերելու և սեր վայելելու գաղտնիքը։ Առաջին անգամ համացանցում «Լադանիվա» խմբի կատարմամբ հայտնվեց հայկական ժողովրդական «Բինգյոլ» երգը, որը միանգամից սիրվեց թե՛ ֆրանսիացի, թե՛ հայ հասարակության կողմից, ինչից հետո խմբի մատուցմամբ հայկական աշուղական երգերի թողարկումը ունեցավ շարունակական բնույթ։

«Լադանիվա»-ին հաջողություն բերեցին ինչպես հայկական աշուղական երգերի cover տարբերակները, այնպես էլ խմբի հեղինակային կատարումները։ Վերջերս նկարահանված «Մեր այգում քեֆ չի լինի» տեսահոլովակի մեկնաբանություններն ու դիտումների թիվը՝ 14 մլն, վկայում են այն մասին, թե որքան է երգը սիրվել լսարանի կողմից։

Արդեն վաղը այդ նույն երգերը կենդանի կատարմամբ հայ հանդիսատեսը հնարավորություն կունենա լսելու Երևանում՝ Կարեն Դեմիրճյանի անվան մարզահամերգային համալիրում։ Արդյո՞ք վաղը մեր այգում քեֆ կլինի, այսօր հրավիրված ասուլիսի ժամանակ խմբի հայազգի երգչուհի Ժակլին Բաղդասարյանը և Լուի Թոմասը նշեցին՝ «Լադանիվա»-ն վաղը սիրով սպասելու է բոլորին․ «Լավ է անցնելու»։

Ժակլինը վերջին անգամ 6 տարի առաջ էր եղել Հայաստանում։ Ասում է՝ ամեն անգամ իրեն մի նոր բան զարմացնում է։ «Քանի որ Հայաստանում եղել եմ Եղեգնաձորում՝ տատիկիս մոտ, Երևանն այնքան էլ լավ չգիտեմ։ Ես այստեղ, կարծես, ծանոթանում եմ ինքս ինձ հետ»,- ասաց երգչուհին։

Իսկ Լուիին, որն առաջին անգամ է Հայաստանում, հենց օդանավակայինից ամեն ինչ տպավորել և հուզել է՝ դիմավորումից մինչև երևանյան գիշերային զբոսանքի ժամանակ աչքի ընկնող հայկական ճարտարապետությունն ու շենքերի յուրահատուկ գույները։

Երևանյան համերգի ընթացքում նոր երաժշտական կատարումներ են լինելու, սակայն խմբի անդամները չցանկացան այդ մասին այսօր խոսել։ «Լինելու են անակնկալներ, բայց դրանց մասին չենք բարձրաձայնի։ Սակայն ասեմ, որ բացի հայկական երգարվեստի կատարումներից՝ հնչելու է նաև բալկանյան երաժշտություն»,- նշեց Ժակլին Բաղդասարյանը։

Հարցին՝ ի՞նչն է գրավում իրենց հայկական երգարվեստում, որը չեն գտնի այլ երկրների մշակույթում, Ժակլինը մատնանշեց․ «Հայկական դուդուկը։ Ես կարողանում եմ միանգամից տարբերել հայկական դուդուկի հնչյունները»։

Մանրամասները՝ տեսանյութում։

Մերի Մանուկյան