30.06.2026 | 11:35
ԱՄՆ-ի և Իրանի բանակցողները մեկնում են Դոհա, սակայն հանդիպումը հաստատված չէ
Եղբորս անունը սկզբում զոհվածների, հետո անհետ կորածների ցուցակում էր. անհետ կորած անձի ընտանիքի անդամ. ՏԵՍԱՆՅՈՒԹ
Հասարակություն
27.05.2021 | 11:37
Եղբորս անունը սկզբում զոհվածների ցուցակում հայտնվեց, հետո անհետ կորածների ցուցակում, որովհետև մարմինը չէին գտել: Այս մասին «Անհետ կորած անձանց և նրանց ընտանիքների իրավունքների պաշտպանության հնարավորությունները և խնդիրները» թեմայով քննարկման ժամանակ նշեց անհետ կորած զինծառայող Սերգեյ Երիցյանի քույրը՝ Արուսիկ Օհանյանը:
«Դեկտեմբերի 19-ին մենք գտանք տեսանյութ, որտեղ երևացող տղան շատ նման էր եղբորս: Դրա հիման վրա դիմել ենք իրավապաշտպան Արտակ Զեյնալյանին, որից հետո՝ Կարմիր Խաչին, սպառիչ պատասխան չենք ստացել: Հունվարից դիմել եմ ԱԺ պատգամավոր Նազելի Բաղդասարյանին: Ըստ նրա ստացած տվյալների՝ եղբայրս գերի էր…, ըստ ԱԱԾ ցուցակների ևս՝ եղբայրս գերի է»,-նշեց Օհանյանը:
Նա նաև նշեց, որ պետական համակարգի նկատմամբ վստահությունը կորել է, ու չնայած եղբոր անունը տեսել էին զոհերի ցուցակում, իրենք են պնդել, որ երկրորդ անգամ ԴՆԹ փորձաքննություն արվի: «Երկրորդ փորձաքննությունից հետո Ավինյանի գրասենյակից Զարուհի Մաթևոսյանը զանգել է ու ասել, որ բանավոր ճշտել է՝ Սերգեյ Երիցյանի անունով որևէ համընկնում չկա ԴՆԹ-ի ու մոտենամ Հերացու կենտրոն, որպեսզի ինձ հետ քննարկեն, քանի որ դեպքը տարբերվում է: Ես ուղիղ 10 րոպե հետո կենտրոնի դիմաց էի ու ինձ ներսից զանգում են ու ասում. «Կներեք, շփոթմունք է եղել, կրկնակի ԴՆԹ-ն էլ հաստատվեց, կարող եք այստեղ չգալ, զինվորը հաստատ զոհված է: Ու ես մոտենում եմ քննիչներին, պարզվում է, որ այդ օրն է իրենց մոտ հաստատումը եկել…
Մենք այդպես էլ չկարողացանք պարզել, թե պետական կառույցների ցուցակներում ինչպես է եղել, որ եղբայրս հայտնվել է գերիների ցուցակում, եթե տեսանյութը նույնականացված չէ»,- ասաց Օհանյանը:
Նա նաև տեղեկացրեց, որ ՀՔԱՎ-ից երբ զանգել են Զարուհի Մաթևոսյանին, նա ասել է. «Ես ուղղակի չէի ուզում, որ իրենք իրենց ունեցած վերջին հույսը կորցնեին, դրա համար ասացի, որ իմ ունեցած տվյալներով՝ գերի է»:
Մանրամասները՝ տեսանյութում:
