Ովքեր չեն ընդգրկվել «ՔՊ» և «ԲՀԿ» նախընտրական ցուցակներում

Հունիսի 20-ին կանցկացվեն արտահերթ խորհրդարանական ընտրություններ: Կուսակցությունները, կուսակցությունների դաշինքները գրանցման համար փաստաթղթերը Կենտրոնական ընտրական հանձնաժողով պետք է ներկայացնեին մինչև 26.05.2021թ.՝ ժամը 18.00-ն։

Քիչ առաջ «Քաղաքացիական պայմանագիր» կուսակցությունը հրապարակեց ընտրացուցակի առաջին 100 անունները: Ուշագրավն այն է, որ ցուցակում բացակայում են փոխվարչապետի պաշտոնակատար Տիգրան Ավինյանի, Երևանի քաղաքապետ Հայկ Մարությանի, պատգամավորներ Սիփան Փաշինյանի,  Մխիթար Հայրապետյանի, Սոս Ավետիսյանի անունները: Այսինքն, ըստ վերոնշյալ ցուցակի, վերջիններս չեն մասնակցելու կայանալիք ընտրություններին:

«Իմ քայլը» խմբակցության պատգամավորներ Սիսակ Գաբրիելյանը, Վահագն Հովակիմյանը, Քրիստինե Պողոսյանը, Մարիա Կարապետյանը, որոնք 2018 թվականի խորհրդարանական ընտրություններին առանցքային դերակատարում ունեին և ընդգրկված էին ցուցակի առաջին համարներում, այժմ ցուցակի ոչ առաջնային համարներում են ներկայացված:

«Իմ քայլը» դաշինքի ցուցակով խորհրդարանական ընտրություններին մասնակցած Թագուհի Թովմասյանը, որը նոյեմբերի 17-ին դուրս էր եկել «Իմ քայլը» խմբակցությունից, այժմ միացել է «Պատիվ ունեմ» դաշինքին: Թովմասյանը նախընտրական ցուցակի 6-րդ համարն է:

Խմբակցությունից դուրս եկած մեկ այլ պատգամավոր էլ՝ Աննա Գրիգորյանը, միացել է «Հայաստան» դաշինքին՝ զբաղեցնելով ցուցակի երրորդ համարը:

Իսկ ահա ԲՀԿ խմբակցությունից հեռացած Սերգեյ Բագրատյանը հանգրվանել է «Քաղաքացիական պայմանագիր» կուսակցության նախընտրական ցուցակի 52-րդ տեղում։

2021 թվականի հունվարի 9-ին «Իմ քայլը» խմբակցությունից դուրս եկած Սոֆյա Հովսեփյանը  չի մասնակցելու ընտրություններին:

Խմբակցությունից դուրս եկած մյուս պատգամավորները՝ Արսեն Ջուլֆալակյանը, Գևորգ Աճեմյանը, Վարդան Աթաբեկյանը, Գոռ Գևորգյանը, Գայանե Աբրահամյանը ևս ներառված չեն որեւէ ուժի նախընտրական ցուցակում։

Այսօր՝ մայիսի 26-ին, «Իմ քայլը» խմբակցության պատգամավորներ Նիկոլայ Բաղդասարյանն ու Արթուր Մանուկյանը հայտնել են, որ չեն ընդգրկվելու ՔՊ համամասնական ցուցակում և չեն մասնակցելու առաջիկա ընտրություններին: Ավելի վաղ հայտնի էր դարձել, որ Սասուն Միքայելյանը ևս չի մասնակցելու ընտրություններին:

«Բարգավաճ Հայաստան» կուսակցությունը ներկայացրել է նախընտրական ցուցակի առաջին 10-յակին: Ընտրացուցակում, սակայն, ընդգրծված չէ ԲՀԿ փոխնախագահ Վահե Էնֆիաջյանը: Այս հանգամանքը Արման Աբովյանը բացատրել է հետևյալ կերպ. «Գոյություն ունի սերնդափոխության տրամաբանություն»։

Նշենք, որ ավելի վաղ «Բարգավաճ Հայաստան» խմբակցության քարտուղար Արման Աբովյանը հրապարակել էր նախընտրական ցուցակի առաջին եռյակը, որում բացակայում էր Նաիրա Զոհրաբյանի անունը: Ավելի ուշ Զոհրաբյանը հայտնել էր, որ «առաջիկա ընտրություններին չի մասնակցելու «ԲՀԿ» համամասնական ցուցակով»։

Ա․ Հակոբյան