Կողբ գյուղի տղայի ծնողին չեն ասել, որ որդին չկա․ ողնաշարի խնդիր է ունեցել և դիրքեր են բարձրացրել. ՏԵՍԱՆՅՈՒԹ

Այսօր մեր երկրի գերագույն հրամանատարից սկսած՝ ցանկություն չունեն բանակում փոփոխություններ անել և միայն սնունդը փոխելով՝ համարում են, որ մեծ բան են արել: Այս մասին «Մահվան դեպքեր բանակում՝ պատերազմից հետո» թեմայով առցանց քննարկման ժամանակ նշեց «Լրագրողներ հանուն մարդու իրավունքների» ՀԿ-ի նախագահ, իրավապաշտպան Ժաննա Ալեքսանյանը:
Իրավապաշտպանի դիտարկմամբ՝ անհրաժեշտ է ստեղծել արժանապատիվ ծառայության համար պայմաններ, որտեղ պետք է կարգուկանոն գործի և անպատժելիության մթնոլորտն ու գողական բարքերը վերացվեն:

«Պն նախկին նախարար Տոնոյանը թաքցնում էր մահվան դեպքերը, այս նախարարից որևէ խոսք դեռ չենք լսել և չգիտենք՝ ինչ է մտածում»,- նշեց իրավապաշտպանը և հիշեցրեց Կողբ գյուղի բնակչի հետ կատարված դեպքը: Նրա հավաստմամբ՝ տղայի ծնողին չեն ասել, որ որդին զորամասում չէ:  «Մայրն ինքն է գնացել զորամաս՝ պարզելու, թե ինչու չի կարողանում որդու հետ կապ հաստատել: Հրամանատարական կազմը հրամայել է՝ գտի՛ր տղայիդ, բե՛ր: Որդին ողնաշարի խնդիր է ունեցել, սահմանափակումով պետք է ծառայեր, նրան դիրքեր են բարձրացրել… Հրամանատարական կազմը նշել է, որ բացառվում է՝ նա գերի ընկած լինի, բայց տեղեկություն չունեն, թե ուր է այդ զինվորը: Սա անտարբերության և անմարդկային վերաբերմունքի դրսևորում է»,- նշեց Ալեքսանյանը՝ ընդգծելով, որ պատերազմից հետո էլ զինվորների նկատմամբ վերաբերմունքը չի փոխվել, միայն կենացներ են խմում:

Մանրամասները՝ տեսանյութում: