Երեկվանից մամուլում ակտիվորեն քննարկվում է Հենրիխ Մխիթարյանին Հայաստանի ազգային հավաքական չհրավիրելու՝ հավաքականի գլխավոր մարզիչ Խոակին Կապառոսի որոշումը:
Մխիթարյանից բացի՝ Ազգային հավաքական չեն հրավիրվել ևս 11 ֆուտբոլիստներ, որոնցից 7-ը հիմնական կազմի խաղացողներ են: Հավաքականի մարզիչն իր որոշումն այսպես է պարզաբանել․ «Հիմնական կազմի մի շարք ֆուտբոլիստներ այս անգամ բացակայում են ցուցակից: Մենք շատ լավ ենք ճանաչում այդ ֆուտբոլիստներին, մեծ հույսեր ենք կապում նրանց հետ և շատ կարևորում նրանց դերը, սակայն այս անգամ որոշել ենք հանգստի հնարավորություն տալ նրանց և գործի մեջ տեսնել մի քանի երիտասարդների: Կարծում եմ՝ սրանից ավելի լավ հնարավորություն չի կարող լինել նրանց համար: Հրավիրել ենք այն ֆուտբոլիստներին, որոնք իրենց լավ են դրսևորել ներքին առաջնությունում, և ցանկանում ենք ստուգել նրանց կարողությունները Խորվաթիայի ու Շվեդիայի կարգի հզոր հավաքականների դեմ խաղերում»:
Հենրիխ Մխիթարյանն էլ իր հերթին անդրադարձել է Կապառոսի հայտարարությանը՝ գրառում կատարելով սոցցանցերի պաշտոնական էջերում ու նշելով, որ բերված պատճառները համոզիչ չեն իր համար։
«Հայաստանի ազգային հավաքականի մարզչական շտաբից տեղեկացա, որ, ի զարմանս ինձ, առաջիկա միջազգային հանդիպումների համար որոշ պատճառներով չեմ հրավիրվել ընտրանի: Ներկայացված պաշտոնական պատճառները համոզիչ չեն ինձ համար: Այնուամենայնիվ, ես կանգնած եմ տղաների կողքին և նրանց հաջողություն եմ մաղթում գալիք հանդիպումներում»,- գրել է Մխիթարյանը:
Պաշտոնական հայտարարություններից զատ՝ մամուլում ու սոցցանցերում ակտիվորեն շրջանառվում է այն վարկածը, որ Հենրիխ Մխիթարյանին հավաքական չհրավիրվելու որոշումը քաղաքական ենթատեքստ ունի: Հարցի հետ կապված Factor.am-ի հետ զրույցում ՀՖՖ մամուլի բաժնի պատասխանատու Հայկ Կարապետյանը պարզաբանեց. «Կազմի ընտրությունը միայն հավաքականի գլխավոր մարզչի որոշումն է եղել: Կապառոսն այս անգամ որոշել է այս կազմն ընտրել՝ ընկերական հանդիպումներին մասնակցելու համար: Որևէ մեկը Ֆուտբոլի ֆեդերացիայից ոչ մի միջամտություն չունի մարզչի կատարած որոշումներում»,- ընդգծեց Կարապետյանը:
Հիշեցնենք, որ Հայաստանի ազգային հավաքականի և իտալական «Ռոմա»-ի կիսապաշտպան Հենրիխ Մխիթարյանը, հանդես գալով A սերիայի ներքին առաջնությունում, անցկացրել է 34 խաղ՝ դառնալով 13 գոլի և 11 գոլային փոխանցման հեղինակ:
Մերի Մանուկյան
