19.05.2026 | 18:51
Բելառուսը մտադիր է մասնակցել Արցախի տարածքներում նախագծերին
Ճապոնիայի միջազգային համագործակցության գործակալության փորձագիտական խումբն այցելել է ԱԻՆ
25.05.2021 | 20:07
Աղետների ռիսկի նվազեցման նպատակով ճգնաժամային հաղորդակցության և հանրային իրազեկման բարելավման ծրագիր է իրականացվում հայ-ճապոնական գործակցությամբ, որի շրջանակում Ճապոնիայի միջազգային համագործակցության գործակալության փորձագիտական խումբը ժամանել է Հայաստան: Այսօր Արտակարգ իրավիճակների նախարարությունում կայացել է Միասնական համակարգող հանձնաժողովի 3-րդ նիստը: Հյուրերին ողջունել է ԱԻ նախարարի տեղակալ Արկադի Բալյանը. տեղեկացնում են ՀՀ ԱԻՆ-ից:
Ծրագրի նպատակն է ճգնաժամային հաղորդակցության կարողությունների ամրապնդումը: Երկու կողմերի մասնագետներից կազմված աշխատանքային խմբերն այժմ գործողությունների ստանդարտ ընթացակարգ են մշակում երկրաշարժի, սողանքի և անտառային հրդեհի դեպքում ճգնաժամային հաղորդակցության վերաբերյալ: Ուղեցույց է պատրաստվում լրատվամիջոցների համար: Աշնանը կանցկացվի գործնական վարժանք:
Ծրագրի գործողությունները հանրայնացվելու են: Արդյունքների վերաբերյալ ամբողջ տեղեկատվությունը տրամադրվելու է ստեղծվելիք կայքի միջոցով: Ճապոնական կողմի ներկայացուցիչները Հայաստանում կմնան երկու շաբաթ: Այդ ընթացքում աշխատանքային հանդիպումներ ու քննարկումներ կանցկացվեն և կուղենշվեն համագործակցության հետագա զարգացումները: Նիստի ավարտին աշխատանքային պլանի, մոնիթորինգային թերթիկի և նախագծային մատրիցայի փաստաթղթերը վավերացվեցին կողմերի ստորագրությամբ:
