Եթե իշխանությունը ներխուժած թուրքի դեմ չի կռվում, ռուսը պիտի ասի՝ չէ, պիտի կռվե՞նք. Աբովյան. ՏԵՍԱՆՅՈՒԹ

Այն  հակառուսական պրոպագանդայի տարափը, որ այսօր շատ ուժեղ լցվում է հայկական տիրույթ, ստիպում է հիշեցնել մի երկու տարրական բան, որոնց մասին հակառուսական թեզեր գեներացնողները մոռանում են։ Այս մասին ԱԺ նիստի ընթացքում հայտարարեց «Բարգավաճ Հայաստան» խմբակցության քարտուղար Արման Աբովյանը՝ անդրադառնալով ՀՀ սահմանային իրադրության վերաբերյալ ՌԴ գործողություներին։

«Չգիտես ինչու՝ միտք է տարածվում մարդկանց մեջ, թե ՌԴ-ից չեկան, չպաշտպանեցին, քայլեր կատարեցին, որոնք մեղմ էին կամ չէին համապատասխանում այս կամ  այն պարտավորություններին: Դա այդպես չէ։ ՌԴ-ն, լինելով ՀՀ ռազմավարական գործընկեր, առաջին հերթին շարժվում է ՀՀ իշխանության որոշումների ներքո․ եթե իշխանությունը որոշում է, որ ներխուժած թուրքի դեմ կռվել պետք չէ, ինչ-որ մեկը հույսեր ունի, որ ռուսը պետք է ասի՝ չէ՛, մեկ է՝ պետք է գնանք, կռվե՞նք։ Իշխանությունը որոշել է այս ճանապարհը, իրենք էլ ասում են՝ դուք որոշել եք այս ճանապարհը, մենք էլ, ձեր գործընկերը լինելով, սատարում ենք ձեր ընտրած ուղուն»,- նշեց Աբովյանը։

Անդրադառնալով Ռուսաստանի ԱԳ փոխնախարար Սերգեյ Ռուդենկոյի հայտարարությանը՝ Ադրբեջանի՝ ՀԱՊԿ անդմակցության մասին, Արման Աբովյանն ասաց․ «Հարց են տվել ՀԱՊԿ անդամակցության մասին, ինքն ասել է հետևյալը՝ այո, Ուզբեկստանը կարող է մտնել, և ՀԱՊԿ դռները բոլորի առջև բաց են, այնտեղ նաև հարցի մեջ Ադրբեջանի անունն էր տրվել, նաև Ադրբեջանի համար։ Սակայն Ադրբեջանի հետ կապված մինչև դիվանագիտական հարաբերությունները չկարգավորվեն ՀՀ հետ, ՀԱՊԿ կանոնադրությունն արգելում է, որ Ադրբեջանը մտնի։ Հիմա ստացվում է այն, որ այդ մարդն ասում է՝ եթե Հայաստանն Ադրբեջանի հետ հարաբերությունները բարելավեց, ուրեմն Ադրբեջանը կարող է հայտ ներկայացնի։ Շատ պարզ ու հստակ պատասխան էր, և առհասարակ այդ բոլոր գործընթացների շուրջ գեներացնել տրամադրություններ, որոնք վտանգում են մեր ռազմավարական գործընկերոջ հետ հարաբերությունները, այս պարագայում դուք պարզապես ձեզ հարց տվեք՝ ում է ձեռնտու»։

Մանրամասները՝ տեսանյութում: