11.10.2026 | 18:01
Տիգրան Բարսեղյանը` գոլի հեղինակ. ՏԵՍԱՆՅՈՒԹ
Ալիևը հայտարարել է, որ բրիտանական BP-ն ծրագրում է ԼՂ-ում ներդրումներ կատարել արևային էներգետիկայի ոլորտում
21.05.2021 | 14:50
Ադրբեջանն ու բրիտանական BP ընկերությունը քննարկում են Լեռնային Ղարաբաղում արևային էներգիայի արտադրության ստեղծման հարցը։ Տեղական լրատվամիջոցների փոխանցմամբ այս մասին ասել է Ադրբեջանի նախագահ Իլհամ Ալիևը։
«Ինչպես հայտնի է, BP-ն ու Ադրբեջանը քննարկում են Ղարաբաղում արևային էներգիայի արտադրության ստեղծման հարցը։ «Ազատագրված» տարածքներում արևային էներգիայի արտադրության ներդրումների ծրագիր կա: Մեզ համար դա կլինի շահավետ, հատկապես՝ հաշվի առնելով այն, որ մենք Ղարաբաղը հայտարարել ենք «կանաչ գոտի» ու «խելացի քաղաք»»,- ասել է Ալիևը Մեծ Բրիտանիայի արտահանման նախարար Գրեհեմ Սթյուարթի հետ հանդիպմանը։
Ալիևը նշել է, որ բրիտանական ընկերություններին հրավիրել է Արցախի գրավյալ տարածքներում վերականգնման ու վերակառուցման աշխատանքներ իրականացնելու համար և գործընթացն արդեն սկսվել է և որ «քաղաքների գլխավոր հատակագծերն արդեն մշակվել են»։
Ադրբեջանի նախագահը նաև հավելել է, որ Մեծ Բրիտանիայի ընկերությունները Ադրբեջանի տնտեսության մեջ ավելի քան 30 մլրդ դոլարի ներդրում են արել։
«Սա մեզ թույլ է տալիս զարգացնել ոչ միայն նավթագազային արդյունաբերությունը, այլև միևնույն ժամանակ օգնում է ընդհանուր զարգացմանը: Այսօր համագործակցությունը շարունակվում է շատ ակտիվ: BP-ն արդեն 30 տարի մեր ռազմավարական գործընկերն է և այդպիսին կմնա առնվազն առաջիկա 30 տարիներին, քանի որ կան նոր հեռանկարներ, նոր պայմանագրեր են կնքվել», – ասել է Իլհամ Ալիևը։
Նշենք, որ Մեծ Բրիտանիայի արտահանման նախարար Գրեհեմ Սթյուարթը եռօրյա այցով գտնվում է Ադրբեջանում։
Էմմա Չոբանյան
