24.04.2026 | 23:32
Կապանում ջրանջատում կլինի
10 մոդուլային մանկապարտեզ կկառուցվի Արմավիրի, Լոռու, Կոտայքի և Շիրակի մարզերում
Հասարակություն
20.05.2021 | 19:04
ՀՀ կառավարության մայիսի 20-ի նիստում որոշվել է 51 մլն 400 հազար դրամով ավելացնել Կրթության, գիտության, մշակույթի և սպորտի նախարարության բյուջեն, որով նախատեսվում է մարզային 10 համայնքներում սկսել մոդուլային մսուր-մանկապարտեզների կառուցման աշխատանքը. տեղեկացնում են ԿԳՄՍՆ-ից:
ԿԳՄՍ նախարարի պաշտոնակատար Վահրամ Դումանյանը, ներկայացնելով նախագիծը, նշել է, որ գումարը կհատկացվի ՀՀ քաղաքաշինության կոմիտեին` 144 տեղ հզորությամբ մոդուլային մսուր-մանկապարտեզների նախագծանախահաշվային փաստաթղթերի մշակման և համապատասխան համայնքներում տեղակայման համար: Մանկապարտեզները կկառուցվեն մարզային հետևյալ բնակավայրերում.
Արմավիրի մարզում` 5 մսուր-մանկապարտեզ
Գետաշեն համայնք
Նորավան համայնք
Փշատավան համայնք
Լենուղի համայնք
Այգեվան համայնք
Լոռու մարզում` 3 մսուր-մանկապարտեզ
Գոգարան համայնք
Լեռնավան համայնք
Լուսաղբյուր համայնք
Կոտայքի մարզում` 1 մսուր-մանկապարտեզ
Պտղնի համայնք
Շիրակի մարզում` 1 մսուր-մանկապարտեզ
Արևշատ համայնքի Արծվաբերդ բնակավայր
Հիշեցնենք, որ մինչ այդ Կառավարության մայիսի 6-ի և մայիսի 13-ի նիստերում գումար էր հատկացվել 144 տեղ հզորությամբ մոդուլային 10 մսուր-մանկապարտեզի և մինչև 100 սովորողի համար նախատեսված մոդուլային 20 դպրոցի կառուցման համար:
Անդրադառնալով ընդունված որոշմանը` վարչապետի պաշտոնակատար Նիկոլ Փաշինյանը նշել է, որ կրթական հաստատությունների շենքային պայմանների բարելավումը շարունակական գործընթաց է:
«Նախօրեին քննարկված ՀՀ կառավարության միջնաժամկետ ծախսային ծրագրով դպրոցաշինության և մանկապարտեզաշինության լայնածավալ աշխատաքներ են նախատեսված»,- փաստել է նա` ավելացնելով, որ կառուցումից հետո մոդուլային մսուր-մանկապարտեզների բնականոն գործունեության ապահովման պարտավորությունը կդրվի համայնքների վրա: Զուգահեռաբար աշխատանքներ են տարվելու նախադպրոցական կրթության համակարգում աշխատող մանկավարժների վարձատրության ավելացման ուղղությամբ` ատեստավորման և մասնագիտական որակավորման բարելավման ճանապարհով:
ՀՀ ԿԳՄՍ ՆԱԽԱՐԱՐՈՒԹՅԱՆ ՀԱՍԱՐԱԿԱՅՆՈՒԹՅԱՆ ՀԵՏ ԿԱՊԵՐԻ ԵՎ
ՏԵՂԵԿԱՏՎՈՒԹՅԱՆ ՎԱՐՉՈՒԹՅՈՒՆ
