17.09.2026 | 10:00
Ազգային ժողովի նիստը՝ ՈՒՂԻՂ
Գերատեսչություններում պատասխանատու անձինք «անհետացել են»․ լրատվամիջոցների զանգերը մնում են անպատասխան
Քաղաքականություն
20.05.2021 | 14:44
Այսօր առավոտյան Armlur.am-ը տեղեկություն տարածեց այն մասին, որ Գեղարքունիքի մարզի 7 համայնքներում ադրբեջանական կողմն առաջ է եկել: Նշվում է Կութ, Նորաբակ, Վերին Շորժա, Ներքին Շորժա, Ակունք, Այրք` Թարսի բլուր, Ջաղացաձոր համայքների անունները։ Լրատվամիջոցը հղում է կատարել սեփական աղբյուրներին։
Տեղեկությունը ճշտելու համար Factor.am-ը մի քանի ժամ շարունակ փորձեց կապ հաստատել տարբեր գերատեսչությունների հետ, սակայն մեր զանգերը մնացին անպատասխան։
Մեր հեռախոսազանգերին չեն պատասխանում Պաշտպանության նախարարության, Գլխավոր շտաբի լրատվական ծառայություններից, ինչպես նաև ՀՀ վարչապետի խոսնակ Մանե Գևորգյանը։ Չեն պատասխանում նաև Գեղարքունիքի մարզպետ Գնել Սանոսյանն ու Վարդենիսի համայնքապետ Արամ Մելքոնյանը։
Ստեղծված իրավիճակում, երբ լրատվական դաշտ են նետվում իրարամերժ լուրեր, իսկ քաղաքական տարբեր ճամբարների ներկայացուցիչները միմյանց մեղադրում են «մեդիատեռոր» իրականացնելու մեջ, առնվազն տարակուսելի է պետական գերատեսչությունների նման վարքագիծը։
Հարկ ենք համարում նշել, որ հավաստի տեղեկատվության վաակումի ստեղծման համար պատասխանատու են պետական գերատեսչությունները, քանի որ կոնկրետ ռազմական և անվտանգային թեմաներով լրատվամիջոցների՝ տեղեկատվությունը ճշգրտելու գործիքները խիստ սահմանափակ են։
