12.08.2026 | 00:10
«Արարատ-Արմենիան» դուրս մնաց Չեմպիոնների լիգայից. ՏԵՍԱՆՅՈՒԹ
«Երկիր Ծիրանիի» հանրահավաքը Ղարաբաղյան շարժման 30-ամյակի կապակցությամբ՝ ուղիղ միացում
20.02.2018 | 15:58
«Երկիր Ծիրանի» կուսակցության նախագահ Զարուհի Փոստանջյանը Արցախյան շարժման 30-ամյակի կապակցությամբ ուղերձ է հղել.
Կասեցված Մեծ Միացումը նորից շարժման մեջ դնելու մասին
Արցախյան շարժումը ժամանակակից հայ ազգի և հայոց պետականության համար դարձավ բեկումնային: Արցախյան շարժման հիմնական և գլխավոր կարգախոսը` ՄԻԱՑՈՒՄԸ, ունեցավ ազգային գաղափարախոսության հզոր ազդեցություն և ազգային քաղաքական ծրագրի իրականացման կարևոր նշանակություն:
Մինչև 1988-ը, հատկապես՝ վերջին 100-ամյակում, հայ ազգն անընդհատ կրելով պարտություն, երբեմնի քաղաքական ազգ լինելու իր առաքելության վերականգնման և աշխարհում իր արժանի տեղը զբաղեցնելու հարցում ամրագրեց համաշխարհային քաղաքական կարգավիճակ:
1988-ը հայ ազգի արցախյան հատվածը ներկայացրեց Հայկական պետականության բաժան-բաժան արած քաղաքական քարտեզի և հայ ազգի մասնատված մասի լրջագույն քաղաքական հայտը, որը համախմբեց աշխարհի բոլոր հայերին ազգային քաղաքական հայտի շուրջ և հիմք հանդիսացավ ներկայիս Հայկական պետականության քաղաքական քարտեզի համար:
Արցախյան շարժման առաջնորդներից ամենաառաջադեմները տեսնում էին հայոց պետականության և նրա տարածքային ամբողջականության վերականգնումը և հայ ազգի մասնատված հատվածների միացումը մեկ ազգային պետականության ներքո, և որպես Մեծ Միացման սկիզբ, ընդունում էին ոչ միայն Արցախի ԼՂԻՄ հատվածի, այլ նաև ամբողջ Արցախի, Ուտիքի, Գանձակի ու Նախիջևանի միացման և հայ ազգի բոլոր հատվածների քաղաքական իրավունքների վերականգնման հեռատես հնարավորությունը:
Ցավոք, այս քաղաքական հայտն անմիջապես սկսվեց հետապնդվել, և Արցախյան շարժման բեկումնային ընթացքը կասեցվեց:
Մինչ օրս ազատագրված մեր Հայրենիքի մի մասը՝ ներկայիս Արցախի Հանրապետությունը, շարունակում է մնալ մեր կողմից չճանաչված՝ որպես մեր միասնական պետականության մաս, և մեր հայ ազգի արցախյան հատվածն ու համասփյուռ հայությունը շարունակում են զրկված լինել հայոց պետականությունում քաղաքական իրավունքներից:
Արցախյան շարժման 30-ամյա հրաշալի բեկումը կարիք ունի կասեցումից դուրս բերելու և նորովի շարժման մեջ դնելու:
Արդի աշխարհում մեր ազգի և մեր պետականության լուրջ ու ծանրակշիռ կարգավիճակն ամրագրելու համար մեզ կրկին անհրաժեշտ է բեկումնային շարժում՝ ՄԻԱՑՈՒՄ կարգախոսի ներքո, և քաղաքական առաջնորդություն՝ Արցախյան շարժման բեկումնային հերոսներ Արթուր Մկրտչյանի, Լեոնիդ Ազգալդյանի և Մոնթե Մելքոնյանի կերպարներով:
ՄԻԱՑՈՒՄ՝ Հայկական երկու պետությունների:
ՄԻԱՑՈՒՄ՝ Հայաստան-Սփյուռք մեկ քաղաքական մարմնում:
ՄԻԱՑՈՒՄ՝ արդի Հայկական պետականության՝ առայժմ դեռ 42 հազար քառակուսի կիլոմետր քաղաքական քարտեզի ներքո, 10 միլիոնը գերազանցող քաղաքական իրավունքներով հայությամբ:
