USCIRF-ն անհանգստացած է Շուշիի Սուրբ Ամենափրկիչ եկեղեցու՝ ադրբեջանական «ռեստավրացիայի» իրականացմամբ

ԱՄՆ միջազգային կրոնական ազատության հանձնաժողովը՝ USCIRF-ը, մտահոգություն է հայտնել Ադրբեջանում կրոնի օրենքի փոփոխությունների, ինչպես նաև Շուշիի Սուրբ Ամենափրկիչ Ղազանչեցոց եկեղեցու իրավիճակի կապակցությամբ։

«Մենք հիասթափված ենք՝ տեսնելով, որ Ադրբեջանը նոր սահմանափակումներ է մտցնում, որոնք ծառայելու են կրոնի կամ դավանանքի ազատ արտահայտման հետագա սահմանափակմանը։ Մենք կոչ ենք անում Ադրբեջանի կառավարությանը վերանայել այս փոփոխությունները՝ մարդու իրավունքների ոլորտում իր հանձնառությունները հաշվի առնելով։ USCIRF-ը հորդորում է Ադրբեջանին, որպես ԵԱՀԿ անդամ, կառույցից խնդրել օրինական վերլուծություն իր առաջարկած փոփոխությունների մասով»,- ասել է USCIRF-ի ղեկավար Անուրիմա Բհարգավան։

Բացի այդ, USCIRF-ն անհանգստացած է նաև Շուշիի հայկական Սուրբ Ամենափրկիր Ղազանչեցոց տաճարի իրավիճակով։

«USCIRF-ն անհանգստացած է աղոթատեղիների ու կրոնական այլ վայրերի պահպանմամբ, այդ թվում՝ Շուշիի հայկական առաքելական Ղազանչեցոց տաճարով, որի գմբեթները հանվել են «ռեստավրացիայի» անվան տակ»,- ասել է USCIRF հանձնակատար Նադինե Մաենզան՝ հավելելով․ «Մինչ տաճարն իսկապես  վերականգնման կարիք ունի այն վնասներից, որոնք կրել է անցյալ աշնանը Ադրբեջանի հրթիռակոծության արդյունքում, անհրաժեշտ է, որ այն և մյուս վայրերը պատշաճ կերպով վերականգնվեն ու պահպանվեն»։

2021 թվականի զեկույցում USCIRF-ն ԱՄՆ Պետքարտուղարությանն առաջարկել է Ադրբեջանին ներառել հատուկ դիտարկման ցուցակում՝ կրոնական ազատության ոտնահարումների համար։ Մարտին էլ կազմակերպությունը թարմացրել է Ադրբեջանի մասին իր տեղեկատվությունը, որում ներառված են նաև Լեռնային Ղարաբաղի վերջին հակամարտության ընթացքում իրագործված խախտումները։

Էմմա Չոբանյան