ԱՄՆ նախագահի խորհրդականը՝ ՀՀ տարածքն ազատելու մասին․ ՀՀ ԶՈւ-ն պատրաստվում է զորավարժության․ Լուրեր

ԱՄՆ նախագահի ազգային անվտանգության հարցերով խորհրդական Ջեյք Սալիվանը առանձին հեռախոսազրույցներ է ունեցել Հայաստանի վարչապետի պաշտոնակատար Նիկոլ Փաշինյանի և Ադրբեջանի նախագահ Իլհամ Ալիևի հետ. հայտնում է Սպիտակ տունը:

Փաշինյանի հետ զրույցում Սալիվանն ասել է, որ անընդունելի և սադրիչ են համարում Հայաստանի սահմանից ներս ադրբեջանական ուժերի իրականացրած գործողությունները, և տեղեկացրել է, որ ԱՄՆ դիրքորոշումը ներկայացվելու է նաև ադրբեջանական ղեկավարությանը՝ պահանջով դուրս բերել իրենց ուժերը ՀՀ տարածքից:
Ամերիկյան կողմն իր մտահոգությունն է հայտնել նաև Ադրբեջանում պահվող հայ գերիների առնչությամբ և ընդգծել նրանց վերադարձի ապահովման կարևորությունը։

—
ՀՀ ԶՈՒ 4-րդ զորամիավորումում անցկացվել է հրամանատարաշտաբային զորավարժության նախապատրաստմանը հավաք-խորհրդակցություն: Քննարկվել են զորավարժության սցենարով նախատեսված միջոցառումները, մշակվել է գործողությունների հաջորդականությունը, ըստ ուղղությունների՝ ստորաբաժանումների ղեկավարներին տրվել են հանձնարարականներ։

—
«Բարգավաճ Հայաստան» խմբակցության քարտուղար Արման Աբովյանը հրապարակել է հունիսի 20-ին կայանալիք խորհրդարանական ընտրություններին «Բարգավաճ Հայաստան» կուսակցության նախընտրական ցուցակի առաջին եռյակը, ըստ որի՝ ցուցակը կգլխավորի ԲՀԿ առաջնորդ Գագիկ Ծառուկյանը։ Նրան հաջորդում են Միքայել Մելքումյանն ու Իվետա Տոնոյանը։

—
Երևան ժամանելուց հետո «Զվարթնոց» օդանավակայանից բերման է ենթարկվել երևանի նախկին քաղաքապետ Գագիկ Բեգլարյանը։ Factor TV-ին հայտնեցին ոստիկանությունից։ Բեգլարյանի խափանման միջոց է ընտրված կալանքը։ Նա մեղադրվում է առանձնապես խոշոր չափերով անշարժ գույքի յուրացման և պաշտոնեական լիազորությունները չարաշահելու մեղադրանքով։