Ինչ իրավիճակ է տիրում վրացական Դմանիսիում․ ոստիկանության լրացուցիչ ուժերը շարունակում են մնալ այստեղ

Վրաստանի Դմանիսի քաղաքում (Քվեմո Քարթլիի շրջան) իրավիճակը ներկայումս կայուն է, սակայն ոստիկանության լրացուցիչ ուժերը մնում են այստեղ ՝ իրավիճակը վերահսկելու համար, գրում է Sputnik-ի վրացական ծառայությունը:

Դմանիսիում գրեթե մեկ օր է տևել զանգվածային բախումները ադրբեջանցիների և Սվանեթիից ներգաղթած վրացիների միջև: Կողմերի հաշտեցումը ձեռք է բերվել տեղական և կենտրոնական իշխանությունների, ինչպես նաև հոգևորականության ներկայացուցիչների միջամտությամբ: Գործով հետաքննություն է սկսվել: Միջադեպի մասնակիցների հարցաքննությունը շարունակվում է:

Ներքին գործերի նախարար Վախթանգ Գոմելաուրին Դմանիսիում էր։ Վերջինս հայտարարել է, որ կան տուժածներ, սակայն ո՛չ ոստիկանները, ո՛չ էլ միջադեպի մասնակիցները լուրջ վնասվածքներ չեն ստացել:

Հաշտության և քաղաքացիական իրավահավասարության հարցերով նախարարությունից ողջունել են, որ միջադեպն ավարտված է և հույս են հայտնել, որ Վրաստանի յուրաքանչյուր քաղաքացի, անկախ էթնիկ պատկանելությունից, գիտակցում է երկրում կայուն, խաղաղ և հավասար միջավայր հաստատելու պետական պատասխանատվությունը:

Հիշեցնենք՝ Դմանիսիում անկարգությունները սկսվել են կիրակի երեկոյան: Տեղի ադրբեջանցիների և Սվանեթիից ներգաղթած վրացիների միջև վիճաբանությունը, որն այնուհետև վերաճել է արյունալի բախումների, ինչպես ավելի ուշ հայտնի դարձավ, բռնկվել է կենցաղային հողի վրա. տեղական խանութպաններից մեկը  հրաժարվել է ապառիկ գարեջուր վաճառել մի խումբ վրացի տղաների։

Ականատեսների խոսքով ՝ վիրավորված տղաները  տղաների են օգնության կանչել ու փորձել են հարցերը պարզել խանութի տիրոջ հետ: Վերջինս ևս պաշտպաններ է ունեցել։ Արդյունքում մի քանի տասնյակ երիտասարդներ ներքաշվել են ծեծկռտուքի մեջ, որն այնուհետև վերաճել է տեղացի ադրբեջանցիների ու վրացիների միջև բախումների։

Տաթև Ֆռանգյան