19.05.2026 | 23:56
Հայաստանի մի շարք հասցեներում էլեկտրաէներգիայի անջատումներ կլինեն
Գյումրեցի կնոջ սպանության մեջ մեղադրվող ռուս զինծառայողի դատական նիստը հետաձգվեց
Հասարակություն
17.05.2021 | 21:17
Շիրակի մարզի ընդանուր իրավասության դատարանում այսօր հետաձգվել է 1961 թվականին ծնված Գյումրի քաղաքի բնակչուհի Ջուլիետա Ղուկասյանի սպանության գործով դատական նիստը։
Հիշեցնենք՝ Ջուլիետա Ղուկասյանի սպանության մեջ կասկածվում է ռուս պայմանագրային զինծառայող 26-ամյա Անդրեյ Անդրեևիչ Ռազգիլդեևը։ Վերջինս դատական նիստերին մասնակցում է հեռավար՝ տեսակապի միջոցով, նրա ներկայությունն այդպես էլ չկարողացան ապահովել։
Դատավոր Ադրինե Ղուկասյանի նախագահությամբ անցկացվող դատական նիստն այսօր ընդհանրապես չի կայացել՝ թարգմանչի բացակայության պատճառով։ Հաջորդ նիստը նշանակվել է մայիսի 31-ին։
Նախորդ դատական նիստին դատարանն սկսել էր իրեղեն ապացույցների զննությունը։ Ըստ քրեական գործի՝ Անդրեյ Ռազգիլդեևը մեղադրվում է Գյումրու համայնքապետարանի բնակկոմունալ բաժնում որպես հավաքարար աշխատող Ջուլիետա Ղուկասյանին ծեծի հետևանքով մահվան հասցնելու մեջ։
Ռուս զինծառայողը, լինելով ալկոհոլի ազդեցության տակ, 2018 թվականի դեկտեմբերի 2-ին առավոտյան ժամը 07։00-ի սահմաններում հետապնդել է Գյումրու Շահումյան փողոցի ուղղությամբ քայլող Ջուլիետա Ստյոպայի Ղուկասյանին, դիտավորությամբ նրա գլխին և մարմնի տարբեր մասերին մարմնական ծանր վնասվածքներ է հասցրել, ինչն անզգուշությամբ առաջացրել է նրա մահը։
Արմիկ Մովսիսյան
