30.10.2026 | 23:30
Հայաստանի մի շարք հասցեներում էլեկտրաէներգիայի անջատումներ կլինեն
ԵՄ-ն լրացուցիչ 10 միլիոն եվրո մարդասիրական օգնություն կհատկացնի՝ ԼՂ հակամարտությունից տուժածներին աջակցելու համար
Քաղաքականություն
17.05.2021 | 19:59
Եվրամիությունը լրացուցիչ 10 միլիոն եվրո մարդասիրական օգնություն կհատկացնի՝ Լեռնային Ղարաբաղի հակամարտությունից տուժածներին աջակցելու համար:
«Տարածաշրջանում մարդասիրական իրավիճակը շարունակում է մեր ուշադրությունը պահանջել, քանի որ COVID-19 համաճարակի տարածումն էլ ավելի է սրում հակամարտության հետևանքները»,- մայիսի 17-ին հայտարարել է ԵՄ ճգնաժամային կառավարման և հումանիտար օգնության հարցերով հանձնակատար Յանեզ Լենարչիչը:
Նա նշել է, որ Եվրամիությունը զգալիորեն ընդլայնում է իր աջակցությունը՝ «օգնելու հակամարտությունից տուժած մարդկանց բավարարելու իրենց հիմնական կարիքները և կրկին կառուցելու իրենց կյանքը»:
«Ի թիվս այլ բաների, մենք խոսում ենք սննդի, հիգիենայի պարագաների, կենցաղային իրերի և բուժօգնության մասին: Բացի այդ, մարդասիրական օգնությունը կներառի տուժածներին հոգեբանական-սոցիալական աջակցություն»,- ասել է նա:
Իր հերթին, Եվրոպական բարիդրացիության քաղաքականության հարցերով ԵՄ կոմիսար Օլիվեր Վարխեին նշել է, որ այսքանով Բրյուսելի օգնությունը չի ավարտվի։ Եվրամիությունը, մասնավորապես, կշարունակի ջանք գործադրել հարատև սոցիալտնտեսական վերակառուցման ու տարածաշրջանում կայունության համար։ Սրա հետ մեկտեղ Լեռնային Ղարաբաղում ռազմական գործողությունների մեկնարկից ի վեր ԵՄ հատկացրած օգնությունն ընդհանուր առմամբ գերազանցել է 17 միլիոն եվրոն, նշված է հայտարարության մեջ։
Տաթև Ֆռանգյան
