Ադրբեջանը Շուշիում մզկիթ է կառուցում․ Ալիևն ընտանիքի հետ մասնակցել է հիմնարկեքին

Ադրբեջանի կողմից օկուպացված Շուշիում այսօր նոր մզկիթի հիմնարկեքի արարողություն է տեղի ունեցել։ Ադրբեջանական լրատվամիջոցների հաղորդմամբ` արարողությանը մասնակցել է նախագահ Իլհամ Ալիևը՝ ընտանիքի անդամների՝ կնոջ՝ Մեհրիբան Ալիևայի և դուստրերի՝ Աեյլա ու Արզու Ալիևաների հետ։

«Այսօր մենք դրեցինք Շուշիի նոր մզկիթի հիմքը։ Շուշիում նոր մզկիթ կկառուցվի։ Ես վաղուց եմ կառուցման մասին որոշում կայացրել և մտածել դրա ճարտարապետության մասին։ Կարելի է ասել՝ դրա մասին մի քանի ամիս մտածել եմ։ Վերջապես եզրահանգման եկա, որ մզկիթն ու նրա ճարտարապետությունը պիտի խորհրդանշական բնույթ կրեն։ Դրա համար առաջարկեցի, որ մզկիթի ձևն արտացոլի 8 թիվը։ Քանի որ նոյեմբերի 8-ին մենք «ազատագրեցինք» Շուշին։ Մզկիթի երկու մինարեթներն էլ պիտի արտացոլեն 11 թիվը։ Այս գաղափարների հիմա վրա ճարտարապետները սկսել են աշխատանքը»,- ասել է Ալիևը։

Նա նաև նշել է, որ մզկիթի տեղը ևս պատահական չի ընտրվել․ այն գտնվում է քաղաքի վերին հատվածում ու պիտի գերիշխի քաղաքի նկատմամբ։

Նշենք, որ Ադրբեջանը ակտիվ շինարարական աշխատանքներ է իրականացնում Շուշիում։ Քաղաքի հայկական պատմական, հոգևոր, մշակութային ժառանգությունը վտանգված է, քանի որ ռեստավրացիայի անվան տակ ադրբեջանցիները զբաղվում են հուշարձանների հայկական հետքերի վերացմամբ։ Հատկապես վտանգի տակ է Սուրբ Ամենափրկիչ Ղազանչեչոց եկեղեցին, որի գմբեթներն ադրբեջանցիներն արդեն հանել են ու տարբեր կերպ փորձում են այն ներկայացնել ռուս ուղղափառ եկեղեցի։

Էմմա Չոբանյան